മൂവാറ്റുപുഴ: കൊവിഡ് മഹാമാരി പടർന്നുപിടിച്ച ആദ്യ നാളുകൾ മുതൽ എറണാകുളം ജില്ലയിലെ കൊവിഡ് 19 പ്രതിരോധ ബോധവത്കരണ പ്രവർത്തനങ്ങളിൽ പങ്കാളിയായ തർബിയത്ത് ട്രസ്റ്റ് വി.എച്ച്.എസ് സ്‌കൂളിലെ എൻ.എസ്.എസ് യൂണിറ്റിന് അംഗീകാരം. എറണാകുളം ജില്ലാ ഭരണകൂടവും ആരോഗ്യ വകുപ്പും സംയുക്തമായി നടപ്പിലാക്കുന്ന 'സ്വയം' എന്ന് നാമകരണം ചെയ്തിരിക്കുന്ന ബോധവത്കരണ തുടർ പദ്ധതിയുമായി സഹകരിക്കുന്ന ജില്ലയിലെ ഏക വിദ്യാലയമാണ് തർബിയത്ത്. മികച്ച തുടർ പ്രവർത്തങ്ങൾ നടത്തിയതിനുള്ള പ്രശംസാപത്രം ജില്ലാ മെഡിക്കൽ ഓഫീസർ ഡോ. എൻ.കെ കുട്ടപ്പനിൽ നിന്ന് പ്രിൻസിപ്പൽ ജൂലി ഇട്ടിയേക്കാട്ട് ഏറ്റുവാങ്ങി.
തർബിയത്ത് ട്രസ്റ്റ് വെക്കേഷണൽ ഹയർ സെക്കൻഡറി എൻ.എസ്.എസ് യൂണിറ്റ് ജില്ലാ ഭരണകൂടത്തിനും ആരോഗ്യ വകുപ്പിനുമൊപ്പം ക്രിയാത്മകമായി സഹകരിക്കുകയും സമൂഹത്തിലാകമാനം പ്രത്യേകിച്ച് വിദ്യാർത്ഥികൾക്കിടയിൽ സർക്കാർ നിർദ്ദേശങ്ങളും ബോധവത്കരണ സന്ദേശങ്ങളും ഫലപ്രദമായി പ്രചരിപ്പിക്കുന്നതിനോടൊപ്പം കിടപ്പ് രോഗികൾക്കുള്ള മരുന്നുകൾ, മാസ്‌ക് വിതരണം, ഓൺലൈൻ പഠനത്തിനായി വിദ്യാർത്ഥികൾക്ക് ടിവിയും, ടാബ്ലറ്റുകളും, ഭക്ഷ്യധാന്യകിറ്റുകൾ, അഗതി മന്ദിരങ്ങളിൽ ധനസഹായ വിതരണവും, ഓട്ടോ ടാക്‌സി ഡ്രെവർമാർക്കും നഗരത്തിലെ വ്യാപാര സ്ഥാപനങ്ങളിലും ബ്രെയ്ക് ദി ചെയിൻ ഡയറി വിതരണം, ഷോർട്ട് ഫിലിം മത്സരം, സോഷ്യൽ മീഡിയവഴിയുള്ള ബോധവത്കരണ പ്രചരണം, റിവേഴ്‌സ് ക്വാറന്റായിനിൽ ഇരിക്കുന്ന പ്രായമായവരെ ഉൾപ്പെടുത്തി ഓൺലൈനിലൂടെ കലാപരിപാടികൾ, എന്നിവ മികച്ച രീതിയിൽ സംഘടിപ്പിച്ചതിനാണ് അംഗീകാരം. ചടങ്ങിൽ മാസ് മീഡിയാ ഓഫീസർ ശ്രീജ, എൻ.എസ്, എസ് പ്രോഗ്രാം ഓഫീസർ സ്‌നേഹ എം.എസ്, സുനിൽ തോമസ്, വോളണ്ടിയർമാരായ ലക്ഷ്മി പ്രിയ, അമീന അസ്സീസ് തുടങ്ങിയവർ പങ്കെടുത്തു.