മൂവാറ്റുപുഴ: പായിപ്ര ഗ്രാമപഞ്ചായത്തിലെ പോയാലിമല ഒത്തിരി ഐതിഹ്യങ്ങൾ നിറഞ്ഞതും പ്രകൃതി രമണീയവുമാണ്. പ്ലസ് വൺ വിദ്യാർത്ഥിയായ ബേസിലാണ് ഇൗ മലയെ പ്രധാന ലൊക്കേഷനാക്കി ഷോർട്ട് ഫിലിം തയ്യാറാക്കി​യത്​. മലയുടെ ചരിത്രംതേടി മാസങ്ങളോളം നീണ്ട അന്വേഷണത്തിനൊടുവിലാണ് ബേസിൽ രചന നിർവഹിച്ചത്. സംവിധാനവും ബേസിലാണ്. ഷറഫ് മുതിരക്കാലായി നിർമ്മാണത്തിനായി മുന്നോട്ടുവന്നതോടെയാണ് ബേസി​ലി​ലെ സിനിമക്കാരൻ ഉണർന്നത്. ഷോർട്ട് ഫിലിം ഹിറ്റായതോടെ പോയാലിമല നേരിട്ടുകാണാൻ നിരവധി സ്ഥലങ്ങളി​ൽനിന്ന് അന്വേഷണങ്ങൾ വന്നുകൊണ്ടിരിക്കുകയാണ്. ഒപ്പം വിനോദ സഞ്ചാരികളുടെ തിരക്കും വർദ്ധിച്ചുവരുന്നു.

വളരെ പണ്ട് ആലി തങ്ങൾ ജീവിച്ചിരുന്നത് മലയുടെ നെറുകയി​ലാണെന്നാണ്പഴമക്കാർ പറയുന്നത്. തങ്ങൾക്ക് കുടിക്കുന്നതിനായി കുത്തിയ കിണർ മലയുടെ നെറുകയിൽ തെളിഞ്ഞ വെള്ളത്തോടെ ഇപ്പോഴും കാണാം.വ്യാസം കുറഞ്ഞ ഇൗ കിണറിൽ ഒരുകാലത്തും വെള്ളം വറ്റുകയില്ല. പാറയിൽ താഴ്ത്തിയ കിണറിൽ വെള്ളം വറ്റാത്തത് പഠനവിധേയമാക്കുന്നതിന് ഗവേഷകരും എത്തുന്നുണ്ട്. ആലി​ തങ്ങളുടെ കാൽപാദങ്ങളും പാറമുകളിൽ തെളിഞ്ഞ് കാണാം. മറ്റൊരു ഐതി​ഹ്യത്തി​ൽ ഭീമസേനൻ മലമുകളിൽ തങ്ങിയതായും പഴമക്കാർ പറയുന്നുണ്ട്. മലമുകളിൽ തങ്ങിയ ഭീമസേനന് ദാഹിച്ചപ്പോൾ വെള്ളം കുടിക്കുന്നതിനായ ചവിട്ടിത്താഴ്ത്തിയ കിണറാണിതെന്നും പറയപ്പെടുന്നു.