കോലഞ്ചേരി: തിരഞ്ഞെടുപ്പ് കാലം ജ്യോത്സ്യന്മാർക്കും ശുഭകാലം. കലികാലമാണോ എന്നറിയാൻ സ്ഥാനാർത്ഥികളും പ്രവർത്തകരും ബന്ധുക്കളുമുൾപ്പെടെ ഒളിഞ്ഞും തെളിഞ്ഞും പത്രികാ സമർപ്പണത്തിന് നല്ലസമയം നോക്കിനടപ്പാണ്. 'അധികം പബ്ലിസി​റ്റി വേണ്ട, ആരോടും പറയേണ്ട' എന്നൊക്കെ പറഞ്ഞാണ് പലരും ജ്യോത്സ്യന്മാരെ കാണാനെത്തുന്നത്. പത്രികാ സമർപ്പണം 19 വരെയാണ്. ഇനി അതിനിടയിൽ ഏ​റ്റവും നല്ല ദിവസം ഏതെന്ന് അറിയാനാണ് പലർക്കും താത്പര്യം.സ്ഥാനാർത്ഥികളുടെ നക്ഷത്രം നോക്കി ജ്യോതിഷികൾ ദിവസം കുറിച്ചുനൽകും. ഒന്നിലധികം ജ്യോത്സ്യന്മാരെക്കണ്ട് തീയതി കൃത്യമാക്കുന്നവരുമുണ്ടത്രെ. പത്രികാ സമർപ്പണദിനം കൃത്യമായി കിട്ടിക്കഴിഞ്ഞാൽ പിന്നെ അറിയേണ്ടത് 'തടസങ്ങളൊന്നുമില്ലല്ലോ?' എന്നാണ്. എന്തായാലും കാര്യങ്ങൾ അനുകൂലമാകണമെങ്കിൽ വോട്ടർമാർ കനിയണമെന്ന് മാത്രം.