കൊച്ചി: പഴഞ്ചൻ സ്റ്റൈലൊക്കെ പടിക്കുപുറത്ത്. മാസ് ലുക്കിൽ സ്ഥാനാർത്ഥികൾ. ഓർഡർ നൽകിയാൽ സ്ഥാനാർത്ഥികളെ പുതിയ ഗെറ്റപ്പിലാക്കി വൈറലാക്കിക്കളയുന്ന പഹയന്മാരുണ്ട് നാട്ടിൽ.
സ്ലോമോഷനിൽ പിന്നണിസംഗീതത്തിന്റെ അകമ്പടിയോടെ സിനിമാ സ്റ്റൈലിൽ ഇറങ്ങിവരുന്ന സ്ഥാനാർത്ഥികളാണ് ഇപ്പോൾ സാമൂഹിക മാദ്ധ്യമങ്ങളിൽ സജീവമായിരിക്കുന്നത്. പഴയപോലെ ചിരിച്ച ചിത്രത്തിലൊന്നും കാര്യമില്ല. അതിന് പകരമാണ് പുതിയ സംവിധാനം. 'ആക്ഷൻ' ചിത്രങ്ങളും അഭിനയവും പാട്ടുമെല്ലാമുണ്ടിതിൽ. ചുരുക്കിപ്പറഞ്ഞാൽ ഒരു സിനിമ പിടുത്തത്തിന്റെ പണിയുണ്ട് പ്രചാരണ വിഡീയോയ്ക്ക്.

ചെലവ് 25 ലക്ഷം
സ്ഥാനാർത്ഥികളെ വൈറലാക്കുന്ന ചെറിയ പോസ്റ്ററുകൾ മുതൽ പ്രചാരണത്തിനായുള്ള ജീപ്പ് വരെ പാക്കേജിൽ ഉൾപ്പെടും. പലതരത്തിലുള്ള സ്റ്റിൽ ഫോട്ടോ, വീഡിയോ ഷൂട്ടിംഗ്, എഡിറ്റിംഗ്, സോഷ്യൽ മീഡിയ മാർക്കറ്റിംഗ്, പ്രൊമോഷൻ കാമ്പയിനുകൾ, പാരഡി ഗാനങ്ങൾ, റിക്കോർഡിംഗ് മെസേജുകൾ, പ്രചാരണത്തിന് തുറന്ന ജീപ്പുകൾ തുടങ്ങിയവ അടങ്ങുന്നതാണ് പാക്കേജ്. ലൈവിലൂടെയാണ് ആദ്യ പ്രചാരണം. ഇതിനായി സ്ഥാനാർത്ഥി സാമൂഹികമാദ്ധ്യമങ്ങളിൽ പ്രത്യക്ഷപ്പെടും.

സ്റ്റൈലൻ ഫോട്ടോ ഷൂട്ട്
ചെറുപ്പക്കാർ മുതൽ പ്രായമായവർക്കുവരെ ഫോട്ടോയിൽ ഗ്ലാമറായിരിക്കണം. സ്റ്റിൽ ഫോട്ടോഗ്രഫിയിൽ മുഖചിത്രമാണ് ആദ്യമെടുക്കുന്നത്. സ്ഥാനാർത്ഥിയെ പരിചയപ്പെടുത്താനുള്ള ആദ്യ അടവ്. രണ്ടാംഘട്ടമായി ഹാഫ് സൈസ് ഫോട്ടോ. പല വേഷങ്ങളിലുള്ള ആക്ഷൻ ചിത്രങ്ങൾ ഉൾപ്പടെ ഇതിലുണ്ടാകും. പ്രൊമോഷൻ കാമ്പയിനുകളുടെ ഭാഗമായുള്ള ചിത്രങ്ങളുമുണ്ടാകും. നാട്ടുകാരോട് സംസാരിക്കുന്നത്, കുട്ടികൾക്കൊപ്പം സന്തോഷം പങ്കിടുന്നത്, വയോജനങ്ങൾക്ക് കരുലേകുന്നത് തുടങ്ങിയ ആശയങ്ങൾ വ്യക്തമാക്കുന്ന ചിത്രങ്ങളാകും ഉപയോഗിക്കുന്നത്. ഒരു സ്ഥാനാർത്ഥിക്കായി കുറഞ്ഞത് 50,000 മുതൽ 70,000 എണ്ണം വരെ പല രൂപത്തിലും വലുപ്പത്തിലുമുള്ള പോസ്റ്ററുകൾ അച്ചടിക്കും. ഒന്നേകാൽ ലക്ഷം രൂപ മുതൽ ഇതിനു ചെലവ് വരും.

വീഡിയോ മസ്റ്റാണ്
സമൂഹ്യമാദ്ധ്യമങ്ങളിലൂടെയുള്ള പ്രചരണം സജീവമായതോടെയാണ് സ്ഥാനാർത്ഥികൾ വീഡിയോ നിർമിക്കണമെന്ന നിബന്ധനയുമായി മുന്നോട്ടുവന്നത്. മൂന്ന് മിനിറ്റുവരെ ദൈർഘ്യമുള്ള വീഡിയോകൾ ചിത്രീകരിക്കാറുണ്ട്. വീരപരിവേഷം നൽകുന്ന തരത്തിലുള്ള സിനിമാ സ്റ്റൈൽ വീഡിയോകൾ ആവശ്യപ്പെടുന്നവരുമുണ്ട്. 15,000മുതൽ 50,000 രൂപ വരെ ചെലവ് വരും. ഷൂട്ടിഗ്, എഡിറ്റിംഗ്, വീഡിയോയുടെ ദൈർഘ്യം എന്നിവയ്ക്കനുസരിച്ചാകും വില.

ഫോണിലുമുണ്ട് സ്ഥാനാർത്ഥി
ഫോണിലേക്ക് വിളിച്ചും വോട്ടു ചോദിക്കാം. ഇതിനായി സ്ഥാനാർത്ഥിയുടെ വോയിസ് റെക്കാർഡ് ചെയ്ത് ബി.എസ്.എൻ.എൽ. ഉൾപ്പെടെ സർവീസ് പ്രൊവൈഡർമാർക്ക് നൽകണം. ഒരു കോളിന് ഒന്നര രൂപയാണ് നിരക്ക്.