കോലഞ്ചേരി: തിരഞ്ഞെടുപ്പ് പ്രചാരണത്തിന്റെ അനുമതിയും വിരൽതുമ്പിലായി. വിവിധ അനുമതികൾക്കായി ഇനി പൊലീസ് സ്റ്റേഷനുകൾ കയറി ഇറങ്ങേണ്ട.

തിരഞ്ഞെടുപ്പ് കമ്മീഷന്റെ സുവിധ വെബ്‌സൈ​റ്റ് വഴി സേവനങ്ങൾ ലഭിക്കുന്ന മൊബൈൽ ആപ്പുമിറങ്ങി. പ്രചാരണ യോഗങ്ങൾ, ജാഥകൾ, ഉച്ചഭാഷിണികൾ, വാഹനങ്ങൾ, താത്കാലിക ഇലക്ഷൻ ഓഫീസ് എന്നിവയ്ക്കുള്ള അനുമതി ലഭിക്കുന്നതിനുള്ള അപേക്ഷകൾ വെബ്‌സൈ​റ്റ് വഴി സമർപ്പിക്കാം. 48 മണിക്കൂർ മുമ്പ് അപേക്ഷി​ക്കണമെന്നേയുള്ളൂ.

പൊലീസ് സ്​റ്റേഷൻ വഴി മാത്രമാണ് നേരത്തെ ഇത്തരം അപേക്ഷകൾ പരിഗണിച്ചിരുന്നത്. സുവിധ വഴിയാണെങ്കി​ൽ നൂലാമാലകൾ ഇല്ലാതെ നടപടിക്രമങ്ങൾ പൂർത്തിയാക്കി ചുരുങ്ങിയ സമയത്തിനുള്ളിൽ അനുമതി ലഭിക്കും. നിരസിച്ചാലും വിവരമറിയാം. www.suvidha.eci.gov.in എന്ന വെബ് അഡ്രസ് വഴി അപേക്ഷ നല്കാം. വിവിധ അപേക്ഷകൾക്ക് വെബ്സൈ​റ്റിൽ പറയുന്ന രേഖകൾ അപ് ലോഡ് ചെയ്യണം. സ്ഥാനാർത്ഥികൾ പത്രിക സമയത്ത് നല്കിയ മൊബൈൽ നമ്പർ വഴി ആപ്പ് ഇൻസ്റ്റാൾ ചെയ്താലും സേവനങ്ങൾ ലഭിക്കും.