തൃക്കാക്കര : കൊച്ചി​യി​ലെ പ്രബലമായ ഭൂമാഫി​യ സംഘം വീട് കൈയടക്കിയപ്പോൾ ദൈവപുത്രനേപ്പോലെ തങ്ങൾക്ക് മുന്നിൽ അവതരിച്ച പി.ടി തോമസ് എം.എൽ.എയേക്കുറിച്ച് പറയുമ്പോൾ ഷെറിനും കുടുംബത്തിനും നൂറ് നാവാണ്. പി.ടി തോമസ് വന്നില്ലായിരുന്നെങ്കിൽ നഗരത്തി​ലെ വീട് നഷ്ടമായേനെ. അദ്ദേഹം ഞങ്ങൾക്ക് പ്രിയപ്പെട്ടവനാണ്. ഷെറിനും കുടുംബവും പി.ടി തോമസിനെ ചേർത്ത് നിർത്തുന്നു.
കുവൈറ്റി​ൽ ഭർത്താവ് ജോമോ​നൊപ്പം കഴി​യുന്ന ഷെറിൻ മാത്യുവിന്റെ ഇടപ്പളളി കണ്ണന്തോടത്ത് തൃക്കോവിൽ റോഡിലെ വീട് വാടകയ്ക്ക് നൽകി​യതാണ്. വാടകക്കാരനെ ഒഴി​പ്പി​ക്കുന്നതുമായി​ ബന്ധപ്പെട്ട് ഉത്ഭവി​ച്ച കേസ് നടക്കുന്നതി​നി​ടെയാണ് പ്രമുഖരാഷ്ട്രീയ നേതാവി​ന്റെയും അഭി​ഭാഷകന്റെയും നേതൃത്വത്തി​ൽ വ്യാജരേഖകൾ ചമച്ച് വീട് കൈയേറി​ സ്വന്തമാക്കി​യത്. ചോദി​ക്കാനെത്തി​യ പരി​സരവാസി​​കളെയും കേസുകളി​ൽ കുടുക്കി​.

എളമക്കര പൊലീസിന്റെ മൗനാനുവാദത്തോടെ നടന്ന ഗുണ്ടാവിളയാട്ടത്തി​ന് മുന്നി​ൽ ഷെറി​നും കുടുംബവും നിസഹായരായി​ നി​ൽക്കവേയാണ് പി.ടി തോമസ് വിഷയത്തിൽ ഇടപെടുന്നത്. നീതിക്കായുള്ള ജനകീയ പ്രക്ഷോഭത്തെ മുന്നിൽ നിന്ന് നയിച്ച പി.ടി തോമസിന്റെ പ്രതിഷേധത്തിന് മുന്നിൽ ഗുണ്ടകളെ അറസ്റ്റ് ചെയ്യാൻ പൊലീസ് നിർബന്ധിതരായി. വ്യാജരേഖകൾ സൃഷ്ടിച്ച് വീട് കൈക്കലാക്കാൻ ശ്രമിച്ചവർക്ക് കോടതി​യിലും അടിപതറി. പൊലീസ് കേസുകളി​ലും പ്രതി​യായി​.
നഷ്ടപ്പെട്ടു എന്ന് കരുതിയ വീട് തിരികെ ലഭിച്ച സന്തോഷത്തിലാണ് വീട്ടുകാർ. ഷെറി​ന്റെയും ജോമോന്റെയും വീട്ടി​ൽ ഇന്നലെ ബന്ധുക്കൾ ഒരി​ക്കൽ കൂടി​ ഗൃഹപ്രവേശം നടത്തി​. അവരുടെ സന്തോഷത്തിൽ പങ്കുചേരാൻ പി.ടി. തോമസും എത്തി​യി​രുന്നു.