കൊച്ചി: ജില്ലയിലെ അവശ്യ സർവീസ് വിഭാഗത്തിനായുള്ള പോസ്റ്റൽ വോട്ടിംഗ് പൂർത്തിയായി. 90.72 ശതമാനം പോളിംഗാണ് ഈ വിഭാഗത്തിൽ രേഖപ്പെടുത്തിയത്. അവശ്യസർവീസ് വിഭാഗത്തിലുണ്ടായിരുന്ന 2544 വോട്ടർമാരിൽ 2308 പേർ നിയോജകമണ്ഡലാടിസ്ഥാനത്തിൽ സജ്ജമാക്കിയിരുന്ന പോസ്റ്റൽ വോട്ടിംഗ് സെന്ററുകളിൽ വോട്ട് രേഖപ്പെടുത്തി.
പുതുതായി തപാൽ വോട്ട് അനുവദിച്ച ആബ്‌സെൻറീവ് വോട്ടേഴ്‌സ് വിഭാഗത്തിന്റെ വോട്ടെടുപ്പ് നടപടികൾ ഇന്ന് പൂർത്തിയാകും. 80 വയസിന് മുകളിൽ പ്രായമുളളവർ, ഭിന്നശേഷിക്കാർ, കോവിഡ് രോഗബാധിതർ എന്നിവർ ഉൾപ്പെടുന്നതാണ് ആബ്‌സെൻറീവ് വോട്ടേഴ്‌സ് വിഭാഗം. ഈ വിഭാഗത്തിൽ ഇതുവരെയുള്ള ആകെ പോളിംഗ് 89.77 ശതമാനമാണ്. ജില്ലയിൽ ഈ വിഭാഗത്തിൽ 3000 പേർക്ക്കൂടി മാത്രമാണ് ബാലറ്റ് പേപ്പർ വിതരണം ചെയ്യാനുള്ളത്. ഈ വിഭാഗത്തിലെ പോസ്റ്റൽ വോട്ടിംഗ് ഇന്ന് പൂർത്തിയാകും.
തിരഞ്ഞെടുപ്പ് ജോലിക്ക് നിയോഗിക്കപ്പെട്ടിട്ടുള്ള ഉദ്യോഗസ്ഥർ പോസ്റ്റൽ വോട്ടിംഗ് സൗകര്യം പ്രയോജനപ്പെടുത്തണമെന്ന് കളക്ടർ എസ്. സുഹാസ് അറിയിച്ചു. പോസ്റ്റൽ വോട്ട് ആവശ്യമുള്ള തിരഞ്ഞെടുപ്പ് ചുമതലയുളള ഉദ്യോഗസ്ഥർ നാലാം തീയതിക്കകം അതത് നിയോജക മണ്ഡലങ്ങളുടെ വരണാധികാരികൾക്ക് അപേക്ഷ നൽകണം.