തൊടുപുഴ: അഖിലേന്ത്യാ ബാങ്ക് പണിമുടക്കിന് മുന്നോടിയായി ബാങ്ക് ജീവനക്കാർ എസ്.ബി.ഐയുടെ തൊടുപുഴ ടൗൺ ശാഖയ്ക്ക് മുമ്പിൽ ധർണ നടത്തി. ബാങ്കിംഗ് മേഖലയിലെ സംഘടനകളുടെ ഐക്യവേദിയായ യുണൈറ്റഡ് ഫോറം ഒഫ് ബാങ്ക് യൂണിയൻസിന്റെ ആഭിമുഖ്യത്തിൽ സംഘടപ്പിച്ച ധർണ തൊടുപുഴ നഗരസഭാ ചെയർമാൻ സനീഷ് ജോർജ്ജ് ഉദ്ഘാടനം ചെയ്തു. വിവിധ ട്രേഡ് യൂണിയൻ നേതാക്കളായ കെ. സലിംകുമാർ (എ.ഐ.ടി.യു.സി), കെ.എം. ബാബു (സി.ഐ.ടി.യു), ടി.എം. ഹാജിറ (എൻ.ജി.ഒ യൂണിയൻ), ബിജുമോൻ ആർ (ജോയിന്റ് കൗൺസിൽ) എന്നിവർ സമരത്തെ അഭിവാദ്യം ചെയ്തു. സമരത്തിൽ ജീവനക്കാർ ഉന്നയിക്കുന്ന വിഷയങ്ങൾ വിശദീകരിച്ചുകൊണ്ട് എ.കെ.ബി.ഇ.എഫ് ഡെപ്യൂട്ടി ജനറൽ സെക്രട്ടറി മാത്യു ജോർജ്ജ്, എൻ.സി.ബി.ഇ ഡെപ്യൂട്ടി ജനറൽ സെക്രട്ടറി സുമേഷ് ജി, ബെഫി സംസ്ഥാന സെക്രട്ടറി സനിൽ ബാബു എൻ, എ.ഐ.ബി.ഒ.സി നേതാവ് കുര്യാച്ചൻ മനയാനി എന്നിവർ സംസാരിച്ചു. യു.എഫ്.ബി.യു ജില്ലാ കൺവീനർ നഹാസ് പി. സലിം ആദ്ധ്യക്ഷത വഹിച്ച യോഗത്തിൽ എൻ.സി.ബി.ഇ. ജില്ലാ സെക്രട്ടറി അനിൽ എ.എസ് സ്വാഗതവും എ.കെ.ബി.ഇ.എഫ്. ജില്ലാ ചെയർമാൻ എബിൻ ജോസ് നന്ദിയും പറഞ്ഞു.