തൊടുപുഴ: 28 ദിവസത്തെ കൊവിഡ് ചികിത്സയ്ക്ക് ശേഷം തിരുവനന്തപുരത്ത് നിന്ന് തൊടുപുഴ പുറപ്പുഴയിലെ പാലത്തിനാൽ വീട്ടിലെത്തിയ കേരളകോൺഗ്രസ് നേതാവ് പി.ജെ. ജോസഫ് കേരളകൗമുദിയോട് മനസ് തുറന്നു.

 ഒരു മാസത്തോളം മാറി നിൽക്കേണ്ടി വന്നല്ലോ?

തിരഞ്ഞെടുപ്പുകാലത്ത് ആദ്യമായാണ് 28 ദിവസത്തോളം മണ്ഡലത്തിൽ നിന്ന് മാറി നിൽക്കുന്നത്. എന്നാൽ ഞാനില്ലാത്തതിന്റെ ഒരു കുറവും പ്രചാരണത്തിലുണ്ടായില്ല. ഫോൺ വഴി എല്ലാവരെയും ബന്ധപ്പെടുന്നുണ്ടായിരുന്നു.

 പി.സി. തോമസുമായുള്ള ലയനം ?

കേരള കോൺഗ്രസിന്റെ വളർച്ചയ്ക്ക് വേണ്ടിയാണ് പി.സി. തോമസുമായി ലയിച്ചത്. ബ്രാക്കറ്റില്ലാത്ത കേരളകോൺഗ്രസ് നേട്ടമുണ്ടാക്കും. തിരഞ്ഞെടുപ്പ് കഴിയുമ്പോൾ ഒറ്റ കേരള കോൺഗ്രസേ കാണൂ.

 ചിഹ്നം ലഭിക്കാത്തത് തിരിച്ചടിയാകുമോ ?

ചിഹ്നത്തിന്റെ കാര്യത്തിൽ 22ന് തീരുമാനമാകും. ട്രാക്ടർ ഓടിക്കുന്ന കർഷകൻ, തെങ്ങിൻതോട്ടം, ഫുട്ബാൾ എന്നീ ചിഹ്നങ്ങളിലേതെങ്കിലും ലഭിക്കുമെന്നാണ് പ്രതീക്ഷ. 10 സ്ഥാനാർത്ഥികൾക്കും ഒരേ ചിഹ്നം തന്നെ കിട്ടും.

 എം.എൽ.എ സ്ഥാനം രാജിവച്ചത് ?

സുതാര്യതയ്ക്ക് വേണ്ടി. അല്ലാതെ വേറെ കാര്യങ്ങളൊന്നുമില്ല.

 ലയനം ബി.ജെ.പി സഖ്യത്തിലേക്കെന്ന ആരോപണം ?

ഞങ്ങൾക്ക് ബി.ജെ.പിയുമായി ബന്ധമുണ്ടെന്ന് പറഞ്ഞാൽ ആരും വിശ്വസിക്കില്ല. മറ്റുള്ളവർക്ക് എന്തും പറയാമല്ലോ.

 യു.ഡി.എഫിന്റെ സാദ്ധ്യത ?

യു.ഡി.എഫിന് അനുകൂലമായ ഒരു തരംഗം സംസ്ഥാനത്തുണ്ട്. സ്വർണക്കള്ളക്കടത്തും ലൈഫ് മിഷൻ തട്ടിപ്പും പിൻവാതിൽ നിയമനവുമടക്കം ഇടതു മുന്നണിക്ക് തിരിച്ചടിയാവും.

 കോൺഗ്രസിനുള്ളിലെ അസ്വാരസ്യങ്ങൾ ബാധിക്കുമോ ?

ഒരിക്കലുമില്ല. ഇതൊക്കെ ചെറിയ പ്രശ്നങ്ങളാണ്. ഇതിനേക്കാൾ വലിയ പ്രശ്നങ്ങൾ ഉണ്ടായിട്ടും വലിയ വിജയം നേടിയിട്ടുണ്ട്.

 പഴയ സഹപ്രവർത്തകനാണല്ലോ ഇത്തവണ എതിരാളി ?

അതിൽ കാര്യമില്ല. 2011ൽ എനിക്കെതിരെ മത്സരിച്ച ജോസഫ് അഗസ്റ്റ്യനും ഒപ്പമുണ്ടായിരുന്നയാളാണ്.

 ഭൂരിപക്ഷം കൂടുമോ ?

മണ്ഡലത്തിലെ എന്റെ പ്രവർത്തനം വച്ചു നോക്കുമ്പോൾ കുറയാൻ കാരണങ്ങളൊന്നുമില്ല.