ആറളം: വന ദിനാചരണത്തോടനുബന്ധിച്ച് മാർച്ച് 5 മുതൽ 21 വരെയുള്ള ദിവസങ്ങളിൽ പാലക്കാട് വൈൽഡ് ലൈഫ് സർക്കിളിന്റെ കീഴിൽ വരുന്ന സങ്കേതങ്ങളിൽ 100 ബ്രഷ് വുഡ് തടയണകൾ നിർമ്മിക്കുന്നതിന്റെ ഭാഗമായി ആറളം വൈൽഡ് ലൈഫ് വാർഡൻ എ. ഷജ്നയുടെ നേതൃത്വത്തിൽ ഡിവിഷനിലെ വനിതാ ജീവനക്കാർ ചേർന്ന് തടയണ നിർമ്മിച്ചു.

ആറളം, കൊട്ടിയൂർ വന്യജീവി സങ്കേതങ്ങളിലെ വനിതാ ജീവനക്കാരായ ഏഴ് ബീറ്റ് ഫോറസ്റ്റ് ഓഫീസർമാരും, ഒരു ഫോറസ്റ്റ് വാച്ചറും, സിവിൽ പൊലീസ് ഓഫീസർ മഞ്ജുഷയും തടയണ നിർമ്മാണത്തിൽ പങ്കാളികളായി. ആറളം വന്യജീവി സങ്കേതത്തിലെ സ്റ്റാഫും വാച്ചർമാരും ബ്രഷ് വുഡ് തടയണ നിർമ്മാണത്തിൽ പിന്തുണയുമായി ഒപ്പമുണ്ടായിരുന്നു.

കണ്ണൂരിന്റെ ജീവനാഡിയായ ചീങ്കണ്ണിപ്പുഴയിലേക്ക് ആറളം കാടുകളിൽ നിന്നും വന്നുചേരുന്ന ചെറതോടുകളിലെ വെള്ളത്തിന്റെ ലഭ്യത വേനൽക്കാലങ്ങളിൽ ഉറപ്പാക്കാനും അതോടൊപ്പം വന്യജീവികൾക്കും, പുഴയുടെ തീരപ്രദേശങ്ങളിൽ താമസിക്കുന്ന ജനങ്ങൾക്കും വേനൽക്കാലങ്ങളിൽ കുടിവെള്ള ക്ഷാമം വരാതിരിക്കുവാനും വേണ്ടിയാണ് വനംവകുപ്പ് ഇങ്ങനെ ഒരു ഉദ്യമത്തിന് തുടക്കം കുറിച്ചത്.