കണ്ണൂർ: വോട്ടെടുപ്പ് നടപടിക്രമങ്ങൾ കുറ്റമറ്റതക്കാനും വിവരങ്ങൾ എളുപ്പത്തിൽ കൈമാറാനും തയ്യാറാക്കിയ പോൾ മാനേജർ മൊബൈൽ ആപ്ളിക്കേഷൻ ഇത്തവണത്തെ തിരഞ്ഞെടുപ്പിനെ സ്മാർട്ടാക്കും. ഇലക്ട്രോണിക് വോട്ടിംഗ് യന്ത്രം ഉൾപ്പെടെയുള്ള പോളിംഗ് സാമഗ്രികളുമായി വോട്ടെടുപ്പിന്റെ തലേന്ന് പോളിംഗ് ഉദ്യോഗസ്ഥർ വിതരണ കേന്ദ്രത്തിൽ നിന്ന് പുറപ്പെടുന്നതു മുതൽ വോട്ടിംഗ് അവസാനിച്ച് തിരികെ സ്വീകരണ കേന്ദ്രത്തിലെത്തുന്നതു വരെയുള്ള കാര്യങ്ങൾ അപ്പപ്പോൾ മേലധികാരികളെ അറിയിക്കുന്നതിനുള്ളതാണ് പോൾ മാനേജർ ആപ്പ്. ഇതോടൊപ്പം, വോട്ടെടുപ്പ് തടസ്സപ്പെടുന്ന രീതിയിലുള്ള എന്തെങ്കിലും അടിയന്തര സാഹചര്യങ്ങളുണ്ടാവുന്ന പക്ഷം ആപിലെ എസ്.ഒ.എസ് ബട്ടൻ അമർത്തിയാൽ വിവരം അപ്പോൾ തന്നെ പൊലീസ് ഉൾപ്പെടെയുള്ള അധികൃതർക്ക് ലഭ്യമാവുന്ന സംവിധാനവും ഇതിലുണ്ട്.
പ്രിസൈഡിംഗ് ഓഫീസർ, ഫസ്റ്റ് പോളിംഗ് ഓഫീസർ, സെക്ടർ ഓഫീസർ എന്നിവർക്ക് ഈ ആപ് ഉപയോഗിക്കാൻ സാധിക്കും. മൊബൈൽ നമ്പർ നൽകി രജിസ്റ്റർ ചെയ്യുമ്പോൾ ലഭിക്കുന്ന ഒ.ടി.പി ഉപയോഗിച്ച് ആപിൽ ലോഗിൻ ചെയ്യാം. ബൂത്തുകളിലേക്ക് പുറപ്പെടുന്നതിനു മുമ്പ് ഉദ്യോഗസ്ഥർക്ക് അവരുടെ നമ്പർ അപ്‌ഡേറ്റ് ചെയ്യാനുള്ള സംവിധാനം വിതരണ കേന്ദ്രങ്ങളിൽ ലഭ്യമായിരിക്കും. ആപ് തടസമില്ലാതെ പ്രവർത്തിക്കുന്നതിന് ഇന്റർനെറ്റ് ഡാറ്റ ബാലൻസ് ഉണ്ടെന്ന് ഉദ്യോഗസ്ഥർ ഉറപ്പുവരുത്തണം.

21 ചോദ്യങ്ങൾ

പോളിംഗ് ഉദ്യോഗസ്ഥർ വിതരണ കേന്ദ്രത്തിൽ നിന്ന് പുറപ്പെട്ടതിന്റെയും എത്തിയതിന്റെയും വിവരങ്ങൾ അപ്പപ്പോൾ തന്നെ രേഖപ്പെടുത്തണം. 21 ചോദ്യങ്ങൾക്കുള്ള ഉത്തരമായാണ് വിവരങ്ങൾ രേഖപ്പെടുത്തേണ്ടത്. പോളിംഗ് ദിവസം രാവിലെ മോക് പോൾ നടത്തിയോ, വോട്ടിംഗ് എപ്പോൾ തുടങ്ങി, എപ്പോൾ അവസാനിച്ചു തുടങ്ങിയ കാര്യങ്ങൾ അപ്പപ്പോൾ നൽകണം. ഓരോ മണിക്കൂറിലും അതുവരെ വോട്ട് ചെയ്ത ആളുകളുടെ എണ്ണം അപ്‌ഡേറ്റ് ചെയ്യാനും ആപ്പിൽ സംവിധാനമുണ്ട്. വോട്ടിംഗ് സമയത്തിന് ശേഷവും വോട്ട് ചെയ്യാൻ ക്യൂവിൽ നിൽക്കുന്നവരുടെ എണ്ണം, ആകെ ചെയ്ത വോട്ടുകൾ, വോട്ടെടുപ്പ് പൂർത്തിയായ സമയം, വോട്ടെടുപ്പ് ഉദ്യോഗസ്ഥ സംഘം കളക്ഷൻ കേന്ദ്രത്തിൽ എത്തിയ വിവരം എന്നിവയും ആപ്പിൽ രേഖപ്പെടുത്തണം.

എല്ലാം സെക്ടർ ഓഫീസർ അറിയും
സെക്ടറൽ ഓഫീസർക്ക് തന്റെ കീഴിലെ എല്ലാ ബൂത്തുകളുടെയും വിവരങ്ങൾ ആപ്പിൽ കാണാനാവും. അതിൽ ഏതെങ്കിലും ബൂത്തിലെ വിവരങ്ങൾ അപ്‌ഡേറ്റ് ചെയ്യാത്തതായുണ്ടെങ്കിൽ സെക്ടർ ഓഫീസർക്ക് വിവരങ്ങൾ അന്വേഷിച്ച് ഡാറ്റ അപ്‌ഡേറ്റ് ചെയ്യാൻ കഴിയും. ഒരു ബൂത്തുമായി ബന്ധപ്പെട്ട പ്രധാനപ്പെട്ട വ്യക്തികളുടെ വിവരങ്ങൾ, ഫോൺ നമ്പർ എന്നിവ ആപ്പിൽ ലഭ്യമാവും. കേരള തിരഞ്ഞെടുപ്പ് കമ്മിഷന് വേണ്ടി നാഷണൽ ഇൻഫർമാറ്റിക് സെന്റർ നിർമ്മിച്ച ഈ ആൻഡ്രോയ്ഡ് ആപ്പ് പ്ലേ സ്റ്റോറിൽ ലഭിക്കും.