കോഴിക്കോട്: നിയമസഭ തിരഞ്ഞെടുപ്പിൽ പെരുമാറ്റച്ചട്ട ലംഘനങ്ങൾക്ക് കടിഞ്ഞാണിടാൻ തിരഞ്ഞെടുപ്പ് കമ്മിഷന്റെ 'സി വിജിൽ' മൊബൈൽ ആപ്ലിക്കേഷൻ. 'സിറ്റിസൻ വിജിലന്റ് "എന്നതിന്റെ ചുരുക്കരൂപമായാണ് സി വിജിൽ.

ഗൂഗിൾ പ്ലേ സ്റ്റോറിൽ നിന്ന് ആൻഡ്രോയ്ഡ് മൊബൈൽ ഫോണുകളിൽ 'സി വിജിൽ ' ഡൗൺലോഡ് ചെയ്യാം. പൊതുജനങ്ങൾക്ക് പെരുമാറ്റച്ചട്ട ലംഘനങ്ങൾ, തിരഞ്ഞെടുപ്പ് ചെലവുകൾ എന്നിവ സംബന്ധിച്ച പരാതികൾ തെളിവുകൾ സഹിതം ഈ ആപ്പ് മുഖേന ഉന്നയിക്കാം. ലഭിക്കുന്ന പരാതികളിൽ 100 മിനിറ്റിനുള്ളിൽ നടപടി സ്വീകരിക്കും. പ്രത്യേക പരിശീലനം നേടിയ ഉദ്യോഗസ്ഥരുടെ നേതൃത്വത്തിൽ കളക്ടറേറ്റിൽ പ്രവർത്തിക്കുന്ന സി വിജിൽ കൺട്രോൾ റൂമിൽ സ്വീകരിക്കുന്ന പരാതികൾ ഫ്‌ളയിംഗ് സ്‌ക്വാഡ്, സ്റ്റാറ്റിക് സർവൈലൻസ് ടീം, റിസർവ് ടീം എന്നീ സ്‌ക്വാഡുകൾ പരിശോധിച്ചാണ് തുടർനടപടി സ്വീകരിക്കുക.
പരാതി അയക്കുന്നതോടെ പരാതിക്കാരന്റെ മൊബൈൽ നമ്പറിലേക്ക് ഒരു കോഡ് ലഭിക്കും. ഈ കോഡ് ഉപയോഗിച്ച് പിന്നീട് പരാതിയുടെ നിലവിലെ സ്ഥിതി കണ്ടെത്താം. പരാതിക്കാരന് സ്വന്തം വിവരങ്ങൾ രഹസ്യമായി സൂക്ഷിക്കാനുള്ള സംവിധാനം ആപ്പിലുണ്ട്. പെരുമാറ്റച്ചട്ട ലംഘനങ്ങളുടെ ചിത്രങ്ങൾ, വീഡിയോ, ജിയോ ടാഗ് എന്നിവ ആപ്പിലൂടെ ബന്ധപ്പെട്ട വരണാധികാരിയ്ക്ക് ലഭിക്കും. മുൻകൂട്ടി തയ്യാറാക്കിയ ചിത്രങ്ങളോ ദൃശ്യങ്ങളോ അംഗീകരിക്കില്ല.