കോഴിക്കോട്: മന്ത്രിമാരായ ടി.പി. രാമകൃഷ്ണൻ, എ.കെ ശശീന്ദ്രൻ എന്നിവരുൾപ്പെടെ ജില്ലയിൽ ഇതുവരെ 22 പേർ നാമനിർദ്ദേശ പത്രിക സമർപ്പിച്ചു. തിരുവമ്പാടി, കൊയിലാണ്ടി, കൊടുവള്ളി, പേരാമ്പ്ര, കോഴിക്കോട് നോർത്ത്, ബേപ്പൂർ, കുന്ദമംഗലം, ബാലുശ്ശേരി, എലത്തൂർ മണ്ഡലങ്ങളിലാണ് പത്രികകൾ ലഭിച്ചത്. കോഴിക്കോട് സൗത്തിൽ ചൊവ്വാഴ്ച ഒരു പത്രിക ലഭിച്ചിരുന്നു. കുറ്റ്യാടി, വടകര, നാദാപുരം മണ്ഡലങ്ങളിൽ ഇതുവരെ പത്രിക ലഭിച്ചിട്ടില്ല.

പേരാമ്പ്ര മണ്ഡലത്തിൽ മന്ത്രി ടി. പി. രാമകൃഷ്ണൻ (സി.പി.എം), ഡമ്മി സ്ഥാനാർത്ഥി തണ്ടോറപ്പാറ പണിയൻചത്തമൂലയിൽ ബാബു (സി.പി.എം) എന്നിവരാണ് പത്രിക സമർപ്പിച്ചത്.എലത്തൂർ മണ്ഡലത്തിൽ മന്ത്രി എ.കെ ശശീന്ദ്രൻ (എൻ.സി.പി) പത്രിക സമർപ്പിച്ചു.

തിരുവമ്പാടി നിയോജക മണ്ഡലത്തിൽ ബുധനാഴ്ച രണ്ടു പേരാണ് പത്രിക സമർപ്പിച്ചത്. കൂടരഞ്ഞി കൂമ്പാറബസാർ പാലക്കൽ ലിന്റോ ജോസഫ് (സി.പി.എം), ഡമ്മി സ്ഥാനാർത്ഥി തിരുവമ്പാടി കൊട്ടാരത്തിൽ ജോളി ജോസഫ് (സി.പി.എം) എന്നിവരാണ് വരണാധികാരിക്ക് മുമ്പാകെ പത്രിക സമർപ്പിച്ചത്.

കൊയിലാണ്ടിയിൽ മൂന്ന് പേർ പത്രിക നൽകി. പയിമ്പ്ര നടുക്കണ്ടിയിൽ എൻ. സുബ്രഹ്മണ്യൻ (ഐ.എൻ.സി), എൽ.ഡി.എഫ് ഡമ്മി സ്ഥാനാർത്ഥി പയ്യോളി പുറക്കാട് തലപ്പൊയിൽതാഴെ ഷീബ (സി.പി.എം), വെങ്ങളം ചെറുവത്ത് സി. പ്രവീൺകുമാർ (എസ്.യു.സി.ഐ കമ്യൂണിസ്റ്റ്) എന്നിവരാണ് പത്രിക നൽകിയത്. ഇതോടെ മണ്ഡലത്തിൽ നാല് പത്രികകൾ ലഭിച്ചു. എൽ.ഡി.എഫ് സ്ഥാനാർത്ഥി കാനത്തിൽ ജമീല നേരത്തെ പത്രിക സമർപ്പിച്ചിരുന്നു.

കൊടുവള്ളിയിൽ കൊടുവള്ളി കാരാട്ട് ഗോൾഡൻവില്ലയിൽ അബ്ദുൽ റസാഖ് (എൽ.ഡി.എഫ് സ്വതന്ത്രൻ), കൊമ്മേരി വെളുത്തേടത്ത് താഴം പി. പി മുഹമ്മദ് മുസ്തഫ (സോഷ്യൽ ഡെമോക്രാറ്റിക് പാർട്ടി ഓഫ് ഇന്ത്യ) എന്നിവരാണ് പത്രിക സമർപ്പിച്ചത്. തിങ്കളാഴ്ച ഒരു പത്രികയും ലഭിച്ചിരുന്നു. ഇതോടെ മൂന്ന് പേർ മണ്ഡലത്തിൽ പത്രിക സമർപ്പിച്ചു.

കോഴിക്കോട് നോർത്ത് മണ്ഡലത്തിൽ തോട്ടത്തിൽ രവീന്ദ്രൻ (സി.പി.എം), കുന്നത്തറ കരിയാരത്ത് റഹിം (എസ്.യു.സി.ഐ കമ്യൂണിസ്റ്റ്) എന്നിവർ പത്രിക സമർപ്പിച്ചു.

കുന്ദമംഗലം മണ്ഡലത്തിൽ പി. ടി. എ. റഹിം (എൽ.ഡി.എഫ് സ്വതന്ത്രൻ), ഡമ്മി സ്ഥാനാർത്ഥി പന്തീരങ്കാവ് പുതുക്കിടി പി. കെ പ്രേംനാഥ് (സി.പി.എം), കുരുവട്ടൂർ പറമ്പിൽ അക്കിനാരിപറമ്പിൽ അബ്ദുൽ വാഹിദ് (എസ്.ഡി.പി.ഐ) എന്നിവർ പത്രിക സമർപ്പിച്ചു.

ബേപ്പൂരിൽ കോട്ടൂളി പുതുക്കുടി പറമ്പ് പി. എ മുഹമ്മദ് റിയാസ് (സി.പി.എം), ചാലിയം വടക്കകത്ത് ജമാൽ (എസ്.ഡി.പി.ഐ) എന്നിവരാണ് പത്രിക സമർപ്പിച്ചത്.

ബാലുശ്ശേരിയിൽ നെല്ലിക്കോട് കച്ചിലാട് മണ്ണാറക്കൽ സച്ചിൻദേവ് (സി.പി.എം), ഡമ്മി സ്ഥാനാർത്ഥി നടുവണ്ണൂർ മന്ദങ്കാവ് പുള്ളിരിക്കൽ ശ്രീജ (സി.പി.എം) എന്നിവരും പത്രിക സമർപ്പിച്ചിട്ടുണ്ട്.