കോഴിക്കോട് : കേരളത്തിൽ ഭരണമാറ്റം സംഭവിച്ചില്ലെങ്കിൽ ബി.ജെ.പിയ്ക്കായിരിക്കും ഗുണമെന്ന് മുസ്ലിം ലീഗ് ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി പറഞ്ഞു.
എലത്തൂർ മണ്ഡലം യു.ഡി.എഫ് സ്ഥാനാർത്ഥി സുൽഫിക്കർ മയൂരിയുടെ തിരഞ്ഞെടുപ്പ് പ്രചാരണത്തിന്റെ ഭാഗമായി തലകുളത്തൂർ പറമ്പത്ത് സംഘടിപ്പിച്ച പൊതുയോഗം ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തിൽ ബി.ജെ.പിയ്ക്ക് വളരാൻ ഇടതുപക്ഷ സർക്കാർ അവസരം ഒരുക്കുകയാണ്. ബി.ജെ.പിക്ക് സീറ്റ് കിട്ടിയാലും സാരമില്ല, കോൺഗ്രസ് നശിച്ചാൽ മതിയെന്ന ചിന്താഗതിയാണ് ഇടതുപക്ഷത്തിന്റേത്.
ഉമ്മൻചാണ്ടി സർക്കാരിന്റെ പദ്ധതികൾ പേര് മാറ്റിയാണ് സർക്കാർ ഇതു വരെ നടപ്പാക്കിയത്. നിലവിൽ ഈ സർക്കാർ വികസന പ്രവർത്തനങ്ങളൊന്നും നടത്തിയിട്ടില്ല. നിഷ്‌ക്രിയമായ ഈ അഞ്ചു വർഷത്തെ ഭരണത്തിൽ യുവാക്കൾക്ക് തൊഴിലവസരങ്ങൾ ഷ്ടമായതായും അദ്ദേഹം പറഞ്ഞു.
യോഗത്തിൽ യു.ഡി.എഫ് നേതാക്കളായ എ. ശ്രീധരൻ, ടി.കെ. രാജേന്ദ്രൻ, ഒ.പി. നസീർ, യു.വി. ദിനേശ് മണി,അക്കിനാരി മുഹമ്മദ്, കുഞ്ഞിക്കണ്ണൻ എന്നിവരും സംസാരിച്ചു.