വൈക്കം : ജീവിതത്തിന്റെ രണ്ടറ്റവും കൂട്ടിമുട്ടിക്കാൻ പൊരിവെയിലത്ത്‌ ലോട്ടറി കച്ചവടം നടത്തുന്ന ഭിന്നശേഷിക്കാരിയ്ക്ക് വനിതാദിനത്തിൽ ആദരം അർപ്പിച്ച് വൈക്കം ശ്രീമഹാദേവകോളേജ്. കോളേജ് എൻ.എസ്.എസ് യൂണിറ്റിന്റെയും വനിതാ സെല്ലിന്റെയും ആഭിമുഖ്യത്തിലാണ് ചടങ്ങ് സംഘടിപ്പിച്ചത്. വൈക്കം ക്ഷേത്രത്തിന്റെ കിഴക്കേ നടയിൽ കാലങ്ങളായി ലോട്ടറി വിൽക്കുന്ന ഭിന്നശേഷിക്കാരിയായ ആനന്ദവല്ലിയ്ക്കും നിരാശ്രയയായ ഗോമതിയമ്മയ്ക്കുമാണ് അദ്ധ്യാപകരും വിദ്യാർത്ഥികളുംചേർന്ന് ആദരം നൽകിയത്. കോളേജ് ഡയറക്ടർ പി.ജി.എം നായർ കാരിക്കോട് പൊന്നാട അണിയിച്ചു. പ്രിൻസിപ്പൽ സെറ്റിന പി പൊന്നപ്പനും, എൻ.എസ്.എസ് പ്രോഗ്രാം ഓഫീസർ അനുസുഗുണനും ചേർന്ന് പുതുവസ്ത്രങ്ങൾ നൽകി. വിദ്യാർത്ഥികൾ മധുര പലഹാരം വിതരണം ചെയ്തു. അദ്ധ്യാപകർ ലോട്ടറി ടിക്കറ്റും എടുത്താണ് യാത്ര പറഞ്ഞത്. കോളേജ് മാനേജർ ബി.മായ , അനുപ പി നാഥ് , ശ്രീലക്ഷ്മി സി നായർ ,ഗീതു കെ.എസ്, മീരാ മഹേശൻ, ശ്രീനാഥ് പി.ജെ, പാർവതി കെ.എസ്, ഇന്ദ്രജിത്ത് എന്നിവർ പങ്കെടുത്തു.