പാലാ: എല്ലാ വിഭാഗം ആളുകളെയുംസഹോദര ഭാവേന സ്വീകരിക്കുന്ന മീനച്ചിലിന്റെ തനതു പാരമ്പര്യം ഉൾക്കൊണ്ടുകൊണ്ടുള്ള പ്രയാണമാണ് പാലാ സെന്റ് തോമസ് സ്‌കൂൾ 125 വർഷമായി നടത്തുന്നതെന്ന് പാലാ രൂപത സഹായമെത്രാൻ മാർ ജേക്കബ് മുരിക്കൻ പറഞ്ഞു.

സ്‌കൂൾ മാനേജർ റവ. ഫാ. സെബാസ്റ്റ്യൻ വെട്ടുകല്ലേൽ അദ്ധ്യക്ഷത വഹിച്ചു. പാലാ നഗരസഭ അധ്യക്ഷൻ ആന്റോ ജോസ് പടിഞ്ഞാറെക്കര മുഖ്യാതിഥിയായിരുന്നു. പാലാ കോർപ്പറേറ്റ് സെക്രട്ടറി റവ.ഫാ.ബർക്കുമാൻസ് കുന്നുംപുറം മുഖ്യപ്രഭാഷണം നടത്തി.

മുനിസിപ്പൽ കൗൺസിലർ ബിജി ജോജോ, സെന്റ് തോമസ് ട്രെയിനിംഗ് കോളേജ് പ്രിൻസിപ്പൽ ഡോ.ടി.സി തങ്കച്ചൻ, പി.ടി.എ പ്രസിഡന്റ് ബിനോയ് തോമസ് എന്നിവർ ആശംസ അർപ്പിച്ചു. 'ഓർമ്മക്കൂട്' എന്ന പൂർവ്വവിദ്യാർത്ഥി സംഘടന നിർദ്ധന വിദ്യാർത്ഥികൾക്കായി ഏർപ്പെടുത്തിയിരിക്കുന്ന സ്‌കോളർഷിപ്പ് തുക സ്‌കൂൾ അധികൃതരെ ഏൽപിച്ചു. നിർധന രോഗികൾക്കായി 125 ഡയാലിസിസ് കിറ്റുകൾ ലയൺസ് ക്ലബ് ഭാരവാഹികൾ സ്‌കൂളിന് കൈമാറി. ഡോ.സി.പ്രിൻസിയുടെ നേതൃത്വത്തിൽ ഹയർസെക്കൻഡറി വിദ്യാർത്ഥികൾ തയ്യാറാക്കിയ 'കെമിസ്ട്രി ഡോട്ട് കോം'എന്ന പുസ്തകത്തിന്റെ പ്രകാശന കർമ്മവും സമ്മേളനത്തിൽ നടന്നു. സ്‌കൂൾ പ്രിൻസിപ്പൽ മാത്യു എം. കുര്യാക്കോസ് സ്വാഗതവും സ്‌കൂൾ ഹെഡ്മാസ്റ്റർ ജോർജ്ജ് കുട്ടി ജേക്കബ് നന്ദിയും പറഞ്ഞു. പൂർവവിദ്യാർത്ഥികളും പൂർവഅദ്ധ്യാപകരും ഉൾപ്പെടെ നിരവധിപേർ ചടങ്ങിൽ പങ്കെടുത്തു.