പാലാ : വലവൂരിൽ നാലേക്കർ കപ്പത്തോട്ടം കത്തി നശിച്ചു. മറ്റ് പത്തേക്കർ കൃഷിയിടത്തിലേക്കും തീപടർന്നു.
വലവൂർ ട്രിപ്പിൾ ഐ.ടി.യുടെ സമീപത്തുനിന്നും ഇന്നലെ രാവിലെ 11 ഓടെ തീ കത്തി പടർന്ന് സമീപത്തുണ്ടായിരുന്ന കൃഷിയിടമാകെ വ്യാപിക്കുകയായിരുന്നു. പരിസരവാസികൾ വിവരമറിയിച്ചതിനെ തുടർന്ന് പാലാ ഫയർഫോഴ്‌സ് എത്തിയെങ്കിലും കുത്തനെയുള്ള കയറ്റമായതിനാൽ ഫയർഫോഴ്‌സ് ടാങ്കർ എത്തിക്കാനായില്ല. കേരള കോൺഗ്രസ് (എം) നേതാവ് ഫിലിപ്പ് കുഴികുളത്തിന്റെ സ്ഥലത്താണ് ഏറെ നാശം. ഈ പുരയിടത്തിൽ ഭരണങ്ങാനം ബ്ലോക്ക് കോൺഗ്രസ് കമ്മറ്റി പ്രസിഡന്റ് കൂടിയായ കർഷകൻ റോയി മാത്യു എലിപ്പുലിക്കാട്ടിന്റെ നാല് ഏക്കർ കപ്പത്തോട്ടമാണ് പൂർണമായി കത്തി നശിച്ചത്. പത്ത് ലക്ഷം രൂപയുടെ നാശനഷ്ടമുണ്ടായതായി റോയി പറഞ്ഞു. ജോസ്. കെ. മാണി, മാണി. സി. കാപ്പൻ എം.എൽ.എ തുടങ്ങിയവർ സ്ഥലം സന്ദർശിച്ചു.