വൈക്കം : ഐതീഹ്യ പെരുമയുടെ നിറവിൽ ആചാരത്തനിമകളോടെ വടയാറിൽ ഇന്ന് ആ​റ്റുവേല. ഇളങ്കാവ് ക്ഷേത്രത്തിലെ ആ​റ്റുവേല ഇന്ന് രാത്രി ആരംഭിക്കും. നാളെ പുലർച്ചെ ആ​റ്റുവേല ദർശനം. രാത്രി കരത്തൂക്കം നടക്കും. മൂവാ​റ്റുപുഴയാറിന്റെ ഓളപ്പരപ്പിൽ ദൃശ്യ വിസ്മയം തീർക്കുന്ന ഇളങ്കാവ് ആ​റ്റുവേല ഇതര ജലോത്സവങ്ങളിൽ നിന്നും വ്യത്യസ്തമാണ്. വടക്കുംകൂർ രാജ വംശത്തിന്റെ ദേവതയായ ഇളങ്കാവ് ഭഗവതിയെ കാണാൻ മീന മാസത്തിലെ അശ്വതി നാളിൽ സഹോദരി കൊടുങ്ങല്ലൂർ ഭഗവതി ജലമാർഗം ഇളങ്കാവ് ക്ഷേത്രത്തിലേക്ക് എഴുന്നള്ളി എത്തുന്നതാണ് ആ​റ്റുവേലയുടെ ഐതിഹ്യം. ആ​റ്റുവേലച്ചാടിന്റെ നിർമ്മാണത്തിൽ തുടങ്ങി ആചാരാനുഷ്ഠാനങ്ങൾ ഒരുപാടുണ്ട് ആ​റ്റുവേലയ്ക്ക്. നിർമ്മാണം പൂർത്തിയായ ചാട് ഇന്ന് രാവിലെ 7.30ന് രണ്ട് കിലോമീ​റ്റർ അകലെയുള്ള ആ​റ്റുവേലക്കടവ് ക്ഷേത്രത്തിലേക്ക് പുറപ്പെടും. അവിടെ നിന്നും മീനമാസത്തിലെ അശ്വതി നാളായ ഇന്ന് 18 നാഴിക പുലരുന്ന രാത്രി 1.30 കഴിഞ്ഞ് സർവാഭരണ വിഭൂഷിതയായ കൊടുങ്ങല്ലൂർ ഭഗവതിയെ മുകളിലത്തെ നിലയിൽ എഴുന്നള്ളിച്ച് ആ​റ്റുവേലക്കടവ് ക്ഷേത്രത്തിലെ പുറക്കളത്തിൽ ഗുരുതി നടത്തി ഇളങ്കാവിലേക്ക് പുറപ്പെടും. നാളെ പുലർച്ചെ 4.30 ഓടെ ക്ഷേത്രകടവിലെത്തും. ക്ഷേത്രമതിലിന് പുറത്ത് പ്രത്യേകം തയാറാക്കിയിട്ടുള്ള പള്ളിസ്രാമ്പിലേക്ക് ഭഗവതിയെ എഴുന്നള്ളിച്ച് പ്രത്യേക പൂജകൾ നടത്തും. ക്ഷേത്രത്തിൽ നാളെ പീലിത്തൂക്കം, കരത്തൂക്കം എന്നിവ നടക്കും.