കോട്ടയം: എന്തു സംഭവിക്കുമെന്ന് പറയാനാവാത്ത മണ്ഡലമാണ് കാഞ്ഞിരപ്പള്ളി. യു.ഡി.എഫിനൊപ്പമായിരുന്ന സിറ്റിംഗ് എം.എൽ.എ ‌ ഡോ.എൻ. ജയരാജ് ഇക്കുറി ഇടതുസ്ഥാനാർത്ഥി. വർഷങ്ങൾക്ക് ശേഷം കൈപ്പത്തി ചിഹ്നത്തിൽ ജോസഫ് വാഴയ്ക്കൻ. തങ്ങളുടെ എ ക്ളാസ് മണ്ഡലത്തിൽ എ ക്ളാസ് സ്ഥാനാർത്ഥിയായി കണ്ണന്താനം. എന്തുകൊണ്ടും പ്രവചനാതീതം.

റബറും കപ്പയും വാഴയുമൊക്കെയാണ് പ്രധാന കൃഷി. കുടിവെള്ള ക്ഷാമം അടക്കമുള്ള അടിസ്ഥാന പ്രശ്നങ്ങളും കേന്ദ്ര-സംസ്ഥാന സർക്കാരുകളുടെ വികസന നയങ്ങളും പ്രചാരണ വിഷയം. ജോസ് കെ. മാണിയുടെ മുന്നണി മാറ്റത്തോടെ ഇതുവരെയില്ലാത്ത രാഷ്ട്രീയ കൗതുകം കൂടി സംഭവിച്ചു . മുഖ്യ ശത്രുവായി കണ്ട് പൊരുതിയിരുന്ന എൻ.ജയരാജ് ഇടതു മുന്നണിയുടെ മിത്രമായി. അതേസമയം കന്നിയങ്കത്തിൽ പൊരുതിയ വാഴയ്ക്കനും കണ്ണന്താനവും വീണ്ടും നേർക്കുനേർ എത്തുകയുമാണ് . തദ്ദേശ തിരഞ്ഞെടുപ്പിൽ ഇടതു മുന്നണിക്കായിരുന്നു മേൽക്കൈ. ഓരോ പഞ്ചായത്തുകൾ വീതം യു.ഡി.എഫും ബി.ജെ.പിയും ഭരിക്കുന്നു. ബാക്കിയെല്ലാം ഇടതുമുന്നണിയുടെ കൈപ്പിടിയിൽ.

നിർണായകം

ബി.ജെ.പി പിടിക്കുന്ന വോട്ടുകൾ. ഒന്നുകിൽ ബി.ജെ.പി ജയിക്കും. അല്ലെങ്കിൽ ആര് ജയിക്കുമെന്ന് തീരുമാനിക്കും.

 മണ്ഡല ചരിത്രം

കാഞ്ഞിരപ്പള്ളി, ചിറക്കടവ്, വെള്ളാവൂർ, മണിമല, നെടുങ്കുന്നം, കങ്ങഴ,വാഴൂർ, പള്ളിക്കത്തോട് പഞ്ചായത്തുകൾ ചേരുന്നതാണ് കാഞ്ഞിരപ്പള്ളി മണ്ഡലം. 2011ലാണ് കാഞ്ഞിരപ്പള്ളിക്ക് രൂപാന്തരം സംഭവിച്ചത്. ഇതോടെ വാഴൂരിലെ അവസാന എം.എൽ.എയും പുതിയ കാഞ്ഞിരപ്പള്ളിയുടെ ആദ്യ എം.എൽ.എയുമായി ജയരാജ് മാറി.

ഡോ.എൻ.ജയരാജ്

2011മുതൽ കാഞ്ഞിരപ്പള്ളിയുടെ ഭാഗമായ എൻ. ജയരാജിന് വ്യക്തിപരമായ സ്വാധീനവും ഇടത് മുന്നണിയുടെ സംഘടനാ സംവിധാനവും തദ്ദേശ തിരഞ്ഞെടുപ്പിലെ മേൽക്കൈയുമാണ് പ്രതീക്ഷ. കോൺഗ്രസ്, ബി.ജെ.പി സ്ഥാനാർത്ഥികൾ ക്രൈസ്തവ വിഭാഗത്തിൽ നിന്നായതിനാൽ നിർണായകമായ നായർ, ഈഴവ വോട്ടുകളിൽ സ്വാധീനം ചെലുത്താനാകുമെന്ന് പ്രതീക്ഷ.

ജോസഫ് വാഴയ്ക്കൻ

2006ൽ കാഞ്ഞിരപ്പള്ളിയിൽ മത്സരിച്ചപ്പോൾ മുതലുള്ള വ്യക്തി ബന്ധം. കൈപ്പത്തി ചിഹ്നത്തിൽ മത്സരിക്കുന്നതിനാൽ കോൺഗ്രസ് പ്രവർത്തകരുടെ പൂർണ പിന്തുണ, സർക്കാ‌ർ വിരുദ്ധ വികാരം , സമുദായവോട്ടുകളിലുള്ള സ്വാധീനം എന്നിവയിൽ പ്രതീക്ഷ.

 അൽഫോൺസ് കണ്ണന്താനം​

ബി.ജെ.പിക്ക് കാഞ്ഞിരപ്പള്ളിയിൽ ലഭിക്കാവുന്ന മികച്ച സ്ഥാനാർത്ഥി. മുൻ സിവിൽ സർവീസ് ഉദ്യോഗസ്ഥൻ,​ എം.പി,​ എം.എൽ.എ, കേന്ദ്രമന്ത്രി​ എന്ന നിലകളിലുള്ള പ്രവർത്തനങ്ങൾ, ജൻമനാട്ടിൽ മത്സരിക്കുന്നു, ബി.ജെ.പി കഴിഞ്ഞ തിരഞ്ഞെടുപ്പുകളിലുണ്ടായ മുന്നേറ്റം എന്നിവ അനുകൂല ഘടകങ്ങൾ. ഹിന്ദു വോട്ടുകൾക്ക് പുറമേ ക്രിസ്ത്യൻ വോട്ടുകളിലും സ്വാധീനം ചെലുത്താനാകും.

വോട്ടുചരിത്രം

2016

യു.ഡി.എഫ്- 53,126

എൽ.ഡി.എഫ്- 49236

ബി.ജെ.പി- 31411

മണ്ഡലചിത്രം

ആകെ വോട്ടർമാർ- 185344

പുരുഷൻമാർ- 90603

സ്ത്രീകൾ -94740

ട്രാൻസ് ജെൻഡേഴ്സ് -1