ലണ്ടൻ:ഇംഗ്ളീഷ് ഫുട്‌ബോൾ ക്ലബ് ലിവർപൂളിന്റെ ഇതിഹാസതാരവും മുൻ സ്‌കോട്ട്‌ലാൻഡ് സ്‌ട്രൈക്കറുമായിരുന്ന ഇയാൻ സെയ്ന്റ് ജോൺ (82) അന്തരിച്ചു. ദീർഘകാലമായി ചികിത്സയിലായിരുന്നു.
1961 മുതൽ 1971 വരെ ലിവർപൂളിനായി 425 മത്സരങ്ങളിൽ ഇയാൻ ഇറങ്ങി. 118 ഗോളും നേടി. രണ്ട് ലീഗ് കിരീടങ്ങളടക്കം ഏഴ് കിരീടവിജയങ്ങളിൽ പങ്കാളിയായി. 1963-64 ലും 1965-66 ലുമായിരുന്നു ലീഗ് കിരീട നേട്ടം.
1965-ൽ എഫ്.എ കപ്പ് ഫൈനലിൽ വിജയിയായി. 26 തവണ സ്‌കോട്ട്‌ലാൻഡിനെ പ്രതിനിധീകരിച്ചു.
മദർവെൽ, കവൻട്രി സിറ്റി, കേപ് ടൗൺ സിറ്റി, ട്രാൻമെറെ റോവേഴ്സ് തുടങ്ങിയ ടീമുകൾക്കായും കളിച്ചു. മദർവെൽ, പോർട്സ്‌മൗത്ത് ടീമുകളെ പരിശീലിപ്പിച്ചു.