ദുബായ് : ദുബായ് ഡ്യൂട്ടി ഫ്രീ നറുക്കെടുപ്പിൽ ഏഴുകോടിയിലേറെ രൂപയുടെ ഭാഗ്യസമ്മാനം നേടി ഇന്ത്യക്കാരൻ. നൈജീരിയയിൽ താമസിക്കുന്ന മുംബയ് സ്വദേശി രാഹുൽ ജുൽക്കയ്ക്കാണ് (53) ഇന്നു നടന്ന നറുക്കെടുപ്പിൽ ഏഴ് കോടിയിലേറെ രൂപ (10ലക്ഷം യുഎസ് ഡോളർ) സമ്മാനമായി ലഭിച്ചത്. ഇതോടൊപ്പം നടന്ന മറ്റൊരു നറുക്കെടുപ്പിൽ മലയാളിയായ നൗഷാദ് തായക്കണ്ടോത്തി (37)ന് ബി.എം.ഡബ്ല്യു എഫ് 900 എക്സ് ആർ ആഡംബര മോട്ടോർ ബൈക്ക് സമ്മാനം ലഭിച്ചു.

പോർട് ഹാർകോർടിൽ താമസക്കാരനായ രാഹുൽ കഴിഞ്ഞ 14 വർഷമായി ദുബായ് ഡ്യൂട്ടി ഫ്രീ നറുക്കെടുപ്പിൽ പങ്കെടുക്കുന്നുണ്ട്.. 2009 ൽ നൈജീരിയയിലേക്ക് പോകുന്നതിന് മുൻപ് ദുബായിലായിരുന്നു താമസം. സാമ്പത്തിക ബാധ്യതകൾ തീർക്കണം. കുറച്ച് പണം റിട്ടയർമെന്റ് ജീവിതത്തിന് നീക്കിവയ്ക്കണം. പിന്നെ, രണ്ടു മക്കളുടെ വിദ്യാഭ്യാസത്തിനും ചെലവഴിക്കണം–രാഹുൽ വ്യക്തമാക്കി. ദുബായ് ഡ്യൂട്ടി ഫ്രീ നറുക്കെടുപ്പിൽ സമ്മാനം നേടുന്ന 177–ാമത്തെ ഇന്ത്യക്കാരനാണ് ഇദ്ദേഹം.