വാഷിംഗ്ടൺ:സ്പേസ് എക്സിന്റെ സ്റ്റാർഷിപ്പ് പ്രോട്ടോടൈപ്പ് എസ്.എൻ 10 ലാൻഡ് ചെയ്ത് മിനിറ്റുകൾക്ക് ശേഷം പൊട്ടിത്തെറിച്ചു. സ്‌പേസ് എക്‌സിന്റെ അടുത്ത തലമുറ സ്റ്റാർഷിപ്പ് റോക്കറ്റിന്റെ ഏറ്റവും നൂതനമായ പ്രോട്ടോടൈപ്പിന്റെ പരീക്ഷണം ബുധനാഴ്ചയാണ് നടന്നത്. ചൊവ്വാ ദൗത്യത്തിനായി വികസിപ്പിച്ചെടുക്കുന്ന റോക്കറ്റിന്റെ അവസാന പതിപ്പാണിത്. പരീക്ഷണം വിജയമെന്ന് പ്രഖ്യാപിച്ചതിന് തൊട്ടുപിന്നാലെയാണ് പേടകം പൊട്ടിത്തെറിച്ച് തകർന്നത്.കൂടുതൽ വിവരങ്ങൾ സ്റ്റാർഷിപ്പ് പുറത്തുവിട്ടിട്ടില്ല.

പത്ത് കിലോമീറ്റർ ഉയരത്തിൽ വരെ പറക്കാനായിരുന്നു ലക്ഷ്യമിട്ടിരുന്നത്.സ്റ്റെയിൻലെസ് സ്റ്റീൽ ഉപയോഗിച്ചാണ് റോക്കറ്റിന്റെ പ്രോട്ടോടൈപ്പുകൾ നിർമിച്ചിരിക്കുന്നത്. ടേക്ക് ഓഫും ലാൻഡിംഗും വിജയമായിരുന്നു.

കൃത്യ സമയത്ത് തന്നെ ടേക്ക് ഓഫ് ചെയ്ത പേടകം പത്ത് കിലോമീറ്ററോളം മുകളിലേക്ക് പോയി. നാലു മിനിറ്റ് 20 സെക്കൻഡ് സമയം മുകളിലേക്ക് പോയതിനു ശേഷം തിരിച്ചിറങ്ങി. 6.20 മിനിറ്റിൽ പേടകം വിജയകരമായി ലാൻഡ് ചെയ്തു. പിന്നാലെ പേടകം തണുപ്പിക്കാനായി വെള്ളം ഉപയോഗിച്ചു. എന്നാൽ, ലാൻഡ് ചെയ്ത് 8.16 മിനിറ്റിനു ശേഷം പേടകം വൻ ശബ്ദത്തോടെ പൊട്ടിത്തെറിക്കുകയായിരുന്നു.

 പൊട്ടിത്തെറി പുതിയ സംഭവമല്ല

സ്പേസ്എക്സ് പേടകം സ്റ്റാർഷിപ്പ് പ്രോട്ടോടൈപ്പ് പരീക്ഷണത്തിനിടെ പൊട്ടിത്തെറിക്കുന്നത് പുതിയ സംഭവമല്ല. 2020 ഡിസംബർ ഒൻപതിനും ഫെബ്രുവരിയിലും പരീക്ഷണ വിക്ഷേപണത്തിനിടെ സ്റ്റാർഷിപ്പിന്റെ പ്രോട്ടോടൈപ്പുകൾ തകർന്നിരുന്നു.

 സ്റ്റാർഷിപ്പ്

ചന്ദ്രനിലേക്കും ചൊവ്വയിലേക്കും മനുഷ്യരെ എത്തിക്കാനായി ശതകോടീശ്വരൻ ഇലോൺ മസ്കിന്റെ സ്പേസ് എക്സ് വികസിപ്പിച്ചെടുത്ത മെഗാ റോക്കറ്റാണ് സ്റ്റാർഷിപ്പ്. സ്റ്റാർഷിപ്പിന് 164 അടി പൊക്കവും 30 അടി വ്യാസവുമുണ്ട്. സ്റ്റാർഷിപ്പിനെ, സൂപ്പര്‍ ഹെവി എന്ന ബൂസ്റ്റർ സംവിധാനവുമായി ഒന്നിപ്പിച്ചിരിക്കുകയാണ്. ഇതോടെ, റോക്കറ്റിന് 387 അടി ഉയരമുണ്ടാകും. ഇതു ബഹിരാകാശത്തേക്ക് 220,000 പൗണ്ട് വഹിക്കും. സ്റ്റാർഷിപ്പ് വീണ്ടും ഉപയോഗിക്കാമെന്നതും പ്രത്യേകതയാണ്.

സ്റ്റെയിൻ‌ലെസ് സ്റ്റീൽ ഉപയോഗിച്ചാണ് സ്റ്റാർഷിപ്പ് നിർമ്മിച്ചത്. ആദ്യം ഹൈ-ടെക് കാർബൺ ഉപയോഗിച്ചു നിർമിക്കാനാണ് ഉദ്ദേശിച്ചിരുന്നത്. എന്നാൽ, പിന്നീട് കട്ടിയുള്ള സ്റ്റീൽ മതിയെന്നു തീരുമാനിച്ചു. സ്റ്റീലാകുമ്പോൾ ചെലവു കുറയും. കൂടുതൽ എളുപ്പത്തിൽ ഘടിപ്പിക്കാം. ബഹിരാകാശത്തെ കഠിന തണുപ്പിലെത്തുമ്പോൾ സ്റ്റീലിന്റെ ശക്തി കൂടും. കൂടാതെ സ്റ്റീലിന് ഉരുകാൻ കൂടുതൽ താപം വേണമെന്നത് തിരിച്ച് ഭൂമിയുടെ അന്തരീക്ഷത്തിലേക്ക് പ്രവേശിക്കുമ്പോൾ ഗുണമാകും.