ഉമ്മൻ ചാണ്ടിയെ എത്രയോ മിമിക്രി കലാകാരന്മാർ അനുകരിക്കുന്നത് നമ്മൾ കണ്ടിട്ടുണ്ട്. രാഷ്ട്രീയക്കാരെ മിമിക്രിക്കാർ അവതരിപ്പിക്കുമ്പോൾ അതിൽ സ്ഥിരം ഹൈലൈറ്റാകുന്നത് പ്രതിപക്ഷ നേതാവും മുഖ്യമന്ത്രിയമൊക്കെയായിരുന്ന ഉമ്മൻചാണ്ടി തന്നെയാണ്. തന്നെ അനുകരിക്കുന്ന മിമിക്രിക്കാരോടുളള ഇഷ്‌ടം ഉമ്മൻ ചാണ്ടി പലവേദികളിലും പറഞ്ഞിട്ടുമുണ്ട്.
കോട്ടയം നസീർ തന്നെ അനുകരിക്കുന്നതാണ് കൂടുതൽ പെർഫെക്‌ടെന്നും ഉമ്മൻ ചാണ്ടി പറ‌ഞ്ഞിട്ടുണ്ട്. ഒരിക്കൽ ഉമ്മൻചാണ്ടിയെ അനുകരിച്ച് കൊണ്ടിരുന്ന സ്റ്റേജിൽ തന്നെ ഞെട്ടിച്ച് അദ്ദേഹം വന്നുകയറിയ അനുഭവം നസീർ തന്നെ പല ചാനൽ പരിപാടികളിലും വിവരിച്ചിട്ടുണ്ട്.
ഇപ്പോൾ ഉമ്മൻ ചാണ്ടിക്ക് തന്നെ കൗതുകമുണർത്തിയ ഒരി കൊച്ചു കുട്ടിയുടെ അനുകരണമാണ് അദ്ദേഹം തന്റെ ഫേസ്ബുക്ക് പേജിൽ പങ്കുവച്ചിരിക്കുന്നത്. അമ്മയുടെ കൈയിലിരുന്ന് ഉമ്മൻ ചാണ്ടിയുടെ മുഖഭാവം കാണിക്കുന്ന കുട്ടിയെ കണ്ട് ഉമ്മൻ ചാണ്ടിയും ഭാര്യയും പൊട്ടിച്ചിരിക്കുകയാണ്. തന്നെ എത്രയോ പേർ വിമർശനാത്മകമായി അവതരിപ്പിക്കാറുണ്ടെന്നും അതെല്ലാം ആസ്വദിച്ചതിനേക്കാൾ എത്രയോ മടങ്ങാണ് ഈ നിഷ്‌ളങ്കമായ പ്രകടനമെന്നും പറഞ്ഞാണ് ഉമ്മൻചാണ്ടി ഫേസ്‌ബുക്കിൽ വീഡിയോ പോസ്റ്റ് ചെയ്‌തിരിക്കുന്നത്.