തിരുവനന്തപുരം: നിയമസഭാ തിരഞ്ഞെടുപ്പിൽ ബി.ജെ.പി സംസ്ഥാന അദ്ധ്യക്ഷൻ കെ സുരേന്ദ്രൻ മത്സരിക്കണമെന്ന് പാർട്ടി കോർ കമ്മിറ്റിയിൽ ആവശ്യമുയർന്നതായി സൂചന.. കോന്നിയിലെ സ്ഥാനാർത്ഥി സാദ്ധ്യതാപട്ടികയിൽ കെ സുരേന്ദ്രന്റെ പേരിനാണ് മുൻതൂക്കം ഉള്ളത്. വി. മുരളീധരൻ മത്സരിക്കാൻ ഇല്ലെങ്കിൽ പാർട്ടിയുടെ എ പ്ലസ് മണ്ഡലമായ കഴക്കൂട്ടത്ത് സുരേന്ദ്രനെ മത്സരിപ്പിക്കണം എന്നും ആവശ്യമുയർന്നു.

നേമത്ത് കുമ്മനം രാജശേഖരനാണ് സാദ്ധ്യത കല്പിക്കുന്നത്. വട്ടിയൂർക്കാവിൽ പട്ടികയിൽ ആദ്യം ഉള്ളത് വി വി രാജേഷാണ്. സുരേഷ് ഗോപി തൃശ്ശൂരിൽ മത്സരിക്കും എന്നും സൂചനയുണ്ട്. ഇ.ശ്രീധരന് പ്രഥമ പരിഗണന നൽകിയിരിക്കുന്നത് പാലക്കാട് മണ്ഡലത്തിലെ സ്ഥാനാർത്ഥി പട്ടികയിലാണ്. മുന്‍ സംസ്ഥാന അദ്ധ്യക്ഷൻ പി.കെ. കൃഷ്ണദാസിനെ കാട്ടാക്കടയില്‍ നിന്ന് മത്സരിപ്പിക്കാനാണ് ആലോചന. മുന്‍ തിരുവനന്തപുരം ജില്ലാ പ്രസിഡന്റായ എസ് .സുരേഷിന് കോവളത്താണ് പ്രഥമ പരിഗണന. നാളെ കേന്ദ്ര ആഭ്യന്തരമന്ത്രി അമിത് ഷാ പങ്കെടുക്കുന്ന കോർ കമ്മിറ്റിയോഗം തിരുവനന്തപുരത്ത് വീണ്ടും ചേരുന്നുണ്ട്.. ഈ യോഗത്തിൽ സ്ഥാനാർത്ഥി പട്ടികയ്ക്ക് അന്തിമ രൂപം നൽകുമെന്നാണ് റിപ്പോർട്ട്.