ചെന്നൈ: തമിഴ്നാട് സീറ്റ് വിഭജന ചർച്ചകൾ ഡി.എം.കെയും കോൺഗ്രസും പൂർത്തിയാക്കി. 25 നിയമസഭ സീറ്റുകളിലും കന്യാകുമാരി ലോക്​സഭ ഉപതിരഞ്ഞെടുപ്പിലും കോൺഗ്രസ്​ മത്സരിക്കും. കഴിഞ്ഞ തവണ 41 സീറ്റുകളിൽ മത്സരിച്ചെങ്കിലും എട്ടു സീറ്റിൽ മാത്രമാണ്​ കോൺഗ്രസിന്​ വിജയിക്കാനായത്​. ഇത്തവണ അവർ 35 സീറ്റ്​ ആവശ്യപ്പെ​ട്ടെങ്കിലും 22 സീറ്റേ നൽകാനാകൂ എന്ന നിലപാടിലായിരുന്നു ഡി.എം.കെ. അതേസമയം,​ ചർച്ചക്കിടെ മുൻ കേരള മുഖ്യമന്ത്രിയും മുതിർന്ന നേതാവുമായ ഉമ്മൻ ചാണ്ടിയെ ഡി.എം.കെ അദ്ധ്യക്ഷൻ എം.കെ സ്റ്റാലിൻ അപമാനിച്ചെന്ന റിപ്പോർട്ടുകൾ തെറ്റാണെന്ന്​ കോൺഗ്രസ്​ സംസ്ഥാന അദ്ധ്യക്ഷൻ കെ.എസ്​. അഴഗിരി വ്യക്തമാക്കി. ​ ബിഹാർ നിയമസഭ തിരഞ്ഞെടുപ്പിൽ കൂടുതൽ സീറ്റുകളിൽ മത്സരിച്ച കോൺഗ്രസിന്​ പ്രതീക്ഷിച്ച വിജയം കഴിയാതിരുന്നത് മൂലം ആർ.ജെ.ഡിക്ക്​ ഭരണം നഷ്​ടമായിരുന്നു. കൂടാതെ,​ പു​തുച്ചേരിയിലടക്കം എം.എൽ.എമാർ രാജിവച്ച്​ ബി.ജെ.പിയിൽ ചേർന്ന സംഭവങ്ങളും ചൂണ്ടിക്കാട്ടിയാണ്​ ഡി.എം.കെ കടുത്ത നിലപാടെടുത്തത്​. ഇതോടെ,​ സഖ്യം വിട്ട്​ മത്സരിക്കണമെന്ന്​ കോൺഗ്രസിലും അഭിപ്രായമുയർന്നു. പിന്നീട്,​ ഹൈക്കമാൻഡ് ഇടപെട്ട്​ ഉമ്മൻചാണ്ടിയെ പ്രത്യേക ദൗത്യവുമായി ​തമിഴ്​നാട്ടിലേക്കയക്കുകയായിരുന്നു. സീറ്റ് വിഭജന ചർച്ചക്കിടെ സ്റ്റാലിൻ ഉമ്മൻ ചാണ്ടിയെ അപമാനിച്ചുവെന്നും ഇതേതുടർന്ന് അഴഗിരി പാർട്ടി നേതാക്കൾക്ക് മുന്നിൽ പൊട്ടിക്കരഞ്ഞുവെന്നുമായിരുന്നു റിപ്പോർട്ടുകൾ. വെള്ളിയാഴ്ച കോൺഗ്രസ്​ എക്​സിക്യൂട്ടീവ്​ കമ്മിറ്റി യോഗത്തിലായിരുന്നു സംഭവം. സീറ്റിന്റെ എണ്ണത്തേക്കാൾ ഉമ്മൻ ചാണ്ടിയോടുള്ള സ്റ്റാലിന്റെ സമീപനമാണ്​​ തന്നെ വേദനിപ്പിച്ചതെന്ന് സീറ്റ് ചർച്ചയ്ക്ക് ശേഷം അഴഗിരി വ്യക്തമാക്കിയിരുന്നു. ഇതോടെ,​ രാഹുൽ ഗാന്ധി അഴഗിരിയുമായി ഫോണിൽ ബന്ധപ്പെട്ട്,​ തരക്കേടില്ലാത്ത സീറ്റുകൾ മുന്നണിയിൽ നിന്ന്​ വാങ്ങിയെടുക്കണമെന്ന് നിർദ്ദേശം നൽകുകയായിരുന്നു.