എഫ്.സി ഗോവ- മുംബയ് സിറ്റി രണ്ടാം പാദ സെമി ഇന്ന്

മഡ്ഗാവ് : ഇന്ത്യൻ സൂപ്പർ ലീഗ് ഫുട്ബാളിൽ എഫ്.സി ഗോവയും മുംബയ് സിറ്റി എഫ്.സിയും തമ്മിലുള്ള സെമിഫൈനലിന്റെ രണ്ടാം പാദം ഇന്ന് നടക്കുന്നു. കഴിഞ്ഞദിവസം നടന്ന ആദ്യ പാദത്തിൽ ഇരുവരും 2-2ന് സമനിലയിൽ പിരിഞ്ഞിരുന്നു. പ്രാഥമിക റൗണ്ടിൽ പോയിന്റ് പട്ടികയിൽ ഒന്നാം സ്ഥാനക്കാരാണ് മുംബയ് സിറ്റി. ഗോവ മൂന്നാം സ്ഥാനക്കാരായാണ് ഫിനിഷ് ചെയ്തത്.

ലീഗ് റൗണ്ടിൽ 20 മത്സരങ്ങളിൽ നിന്ന് 40 പോയിന്റ് നേടിയാണ് മുംബയ് സിറ്റി ഒന്നാമതെത്തിയത്.അവസാന മത്സരത്തിൽ മോഹൻ ബഗാനെ തോൽപ്പിച്ചാണ് മുംബയ് ഒന്നാം സ്ഥാനക്കാർക്കുള്ള ഷീൽഡ് നേടിയത്.അവസാന മത്സരത്തിൽ ഗോവ ഹൈദരാബാദിനെ തോൽപ്പിച്ചാണ് സെമിയിലേക്ക് എത്തിയത്. പ്രാഥമികറൗണ്ടിൽ ഏഴ് മത്സരങ്ങളിൽ മാത്രമാണ് ഗോവ ജയിച്ചത്. ‌ഈ സീസണിൽ രണ്ട് തവണ മുംബയ് സിറ്റിയും ഗോവയും ഏറ്റുമുട്ടി. ആദ്യ തവണ 1-0ത്തിന് മുംബയ് ജയിച്ചു. രണ്ടാം മത്സരം 3-3ന് സമനിലയിൽ പിരിഞ്ഞു.