വാഷിംഗ്ടൺ: അമേരിക്കൻ സംസ്ഥാനമായ ന്യൂയോർക്കിലെ ബ്രൂക്ലിൻ സ്ട്രീറ്റിൽ ഫോണിൽ നോക്കി റോഡ് മുറിച്ചുകടന്ന 61കാരി മണ്ണുമാന്തി യന്ത്രം ഇടിച്ച് മരിച്ചു. എസ്റ്റാൽ ഡേവിസ് എന്ന സ്ത്രീയാണ് മരിച്ചത്.ഫോണിൽ നോക്കി നടക്കുകയായിരുന്ന എസ്റ്റാലിന്റെ തലയിൽ പിറകോട്ടെടുത്ത ജെ.സി.ബി ഇടിക്കുകയായിരുന്നു. പിന്നീട് വാഹനം ഇവരുടെ ശരീരത്തിലൂടെ കയറി ഇറങ്ങി. വാഹനത്തിന്റെ ഡ്രൈവർ ഇതൊന്നും അറിഞ്ഞിരുന്നില്ലെന്നാണ് ന്യൂയോർക്ക് പോസ്റ്റ് പുറത്തുവിട്ട വീഡിയോയിൽ നിന്നും വ്യക്തമാകുന്നത്.

നിർമ്മാണ പ്രവർത്തനങ്ങൾ നടക്കുന്ന സ്ഥലത്താണ് അപകടം നടന്നതെന്നും സംഭവത്തെക്കുറിച്ച് അന്വേഷിക്കുകയാണെന്നും അധികൃതർ പ്രതികരിച്ചു.

അപകടത്തിൽ മരിച്ച എസ്റ്റാൽ നഴ്സാണെന്നാണ് റിപ്പോർട്ടുകൾ. ഇവർ ജോലി സ്ഥലത്തേക്ക് പോകുന്നതിനിടെയാണ് അപകടം നടന്നതെന്ന് ബന്ധുക്കൾ പറഞ്ഞു.