തിരുവനന്തപുരം: തനിക്കെതിരെയുള്ള പി ജയരാജന്റെ വിമർശനത്തിന് മറുപടിയുമായി നടൻ ശ്രീനിവാസൻ. ഒട്ടും ബുദ്ധിയില്ലാത്ത സമയത്ത് താൻ എസ് എഫ് ഐ ആയിരുന്നെന്നും, കുറച്ച് ബുദ്ധിവച്ചപ്പോൾ കെ എസ് യുവിലേക്കും എ ബി വി പിയിലേക്കും മാറിയെന്നും, ഇപ്പോൾ ട്വന്റി ട്വന്റിക്കാരനായെന്നും തോന്നിയാൽ ഇവിടെ നിന്നും മാറുമെന്നും അദ്ദേഹം പറഞ്ഞു.

ഇന്ത്യൻ ഭരണഘടന പ്രകാരം ഒരാൾക്ക് എത്ര പാർട്ടിയിലും ചേരാമെന്നും, ഇതെല്ലാം താൽക്കാലികമാണെന്നും അദ്ദേഹം പറഞ്ഞു. ട്വന്റി ട്വന്റിക്ക് പിന്തുണയറിയിച്ച് കഴിഞ്ഞ ദിവസം ശ്രീനിവാസൻ പരസ്യമായി രംഗത്തെത്തിയിരുന്നു.

കേരളം ട്വന്റി ട്വന്റി മാതൃകയാക്കണമെന്നും, സംസ്ഥാനത്താകെ സജീവമായാൽ സംഘടനയിൽ ചേർന്ന് പ്രവർത്തിക്കുമെന്നും ശ്രീനിവാസൻ പറഞ്ഞിരുന്നു. തൊട്ടുപിന്നാലെ ശ്രീനിവാസനെ വിമർശിച്ചുകൊണ്ട് പി ജയരാജൻ രംഗത്തെത്തുകയും ചെയ്തിരുന്നു. ശ്രീനിവാസൻ കൃത്യമായി രാഷ്ട്രീയം മനസിലാക്കുന്ന വ്യക്തിയല്ലെന്നും, ചാഞ്ചാട്ടക്കാരനാണെന്നുമായിരുന്നു ജയരാജൻ പറഞ്ഞത്.