ജയ്‌പൂർ: ബ്രഹ്മകുമാരീസ് ഈശ്വരീയ വിശ്വ വിദ്യാലയം ആത്മീയമേധാവി (ഗ്ലോബൽ ചീഫ്) രാജയോഗിനി ഡോ. ദാദി ഹൃദയ മോഹിനി (94) അന്തരിച്ചു. 'ഗുൽസാർ ദാദി" എന്ന പേരിലാണ് അറിയപ്പെട്ടിരുന്നത്. സംസ്കാരം 13ന് രാജസ്ഥാൻ മൗണ്ട് അബു റോഡിലെ ബ്രഹ്മാകുമാരീസ് ആസ്ഥാനത്തെ ശാന്തിവൻ കാമ്പസിൽ നടത്തും.

എട്ടാം വയസിലാണ് ഗുൽസാർ ദാദി, വനിതകൾ നയിക്കുന്ന ലോകത്തിലെ ഏറ്റവും വലിയ ആത്മീയപ്രസ്ഥാനമായ ബ്രഹ്മകുമാരീസിൽ അംഗമായത്. 140 രാജ്യങ്ങളിലായി 8000ൽ അധികം രാജയോഗ കേന്ദ്രങ്ങൾ ഇവരുടെ നേതൃത്വത്തിൽ സ്ഥാപിച്ചിരുന്നു.

122 രാജ്യങ്ങൾ സന്ദർശിച്ച് ബ്രഹ്മകുമാരീസിന്റെ സന്ദേശം പ്രചരിപ്പിച്ചു. ആത്മീയത, സാമൂഹിക സേവനം എന്നിവയിലെ സംഭാവനകൾ മാനിച്ച് ഒഡിഷ യൂണിവേഴ്സിറ്റി ഡോക്ടറേറ്റ് നൽകി ആദരിച്ചു. ഒട്ടേറെ രാജ്യാന്തര, ദേശീയ കൂട്ടായ്മയുടെ സംഘാടകയായിരുന്നു. 2020 മാർച്ച് 27ന് രാജയോഗിനി ദാദി ജാനകിയുടെ നിര്യാണത്തിന് ശേഷമാണ് ആത്മീയമേധാവിയായി ചുമതലയേൽക്കുന്നത്.
ലോക്‌സഭാ സ്പീക്കർ ഓം ബിർള, ചത്തീസ്ഗഢ് മുഖ്യമന്ത്രി ഭൂപേഷ് ബാഗൽ തുടങ്ങിയവർ അനുശോചിച്ചു.