ടെൽ അവീവ്​: കഴിഞ്ഞ രണ്ടു വർഷത്തിനിടെ അയൽ രാജ്യമായ സിറിയയിലേക്ക്​ എണ്ണ കൊണ്ടുവന്ന ഒരു ഡസൻ കപ്പലുകൾക്കുനേരെയെങ്കിലും ഇസ്രയേൽ ബോംബ്​ വർഷിച്ചെന്ന് യു.എസ് ഉദ്യോഗസ്ഥരെ ഉദ്ധരിച്ച് വാൾ സ്ട്രീറ്റ് ജേണലിന്റെ റിപ്പോർട്ട്. നേരിട്ട്​ ബോംബുവർഷം നടത്തുന്നതിന്​ പകരം

ജല കുഴിബോംബുകൾ സ്ഥാപിച്ചും മറ്റുമാണ്​ ഇവക്കെതിരെ ആക്രമണം നടത്തിയത്​​. ഇറാന്റെ കപ്പലുകളാണ് കൂടുതൽ ആക്രമണം നേരിട്ടത്.

സിറിയയിലെ ഇറാൻ ഇടപെടൽ​ അവസാനിപ്പിക്കാൻ ലക്ഷ്യമിട്ട്​ ​നിരവധി ​തവണ ബോംബാക്രമണങ്ങൾ നടത്തിയതിന്റെ റിപ്പോർട്ടുകൾ നേരത്തെ പുറത്തുവന്നിരുന്നു. എണ്ണ കടത്തിനു പുറമെ ആയുധ കൈമാറ്റവും തിരിച്ചറിഞ്ഞ്​ ഇസ്രയേൽ ആക്രമണം നടത്തി. തകർന്നില്ലെങ്കിലും ആക്രമണ ഭീഷണിയുള്ളതിനാൽ തിരിച്ചുപോകാൻ കപ്പലുകൾ നിർബന്ധിതമായെന്നും റിപ്പോർട്ടിൽ പറയുന്നു. അമേരിക്കയുടെ പിന്തുണയോടെയാണ് ഇസ്രയേൽ മേഖലയിൽ സൈനിക നീക്കങ്ങൾ നടത്തുന്നത്​. മുൻ അമേരിക്കൻ പ്രസിഡന്റ് ഇസ്രയേലിന് പൂർണ പിന്തുണ നൽകിയിരുന്നു. എന്നാൽ, ജോ ബൈഡൻ എത്രകണ്ട്​ പിന്തുണക്കുമെന്ന ആശങ്ക ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനുണ്ട്.