വാഷിംഗ്ടൺ: പൊതുജീവിതത്തിൽ നിന്ന് വിരമിക്കാൻ പദ്ധതിയിട്ട് മുൻ അമേരിക്കൻ പ്രസിഡന്റ് ബറാക് ഒബാമയുടെ പത്നിയും എഴുത്തുകാരിയുമായ മിഷേൽ ഒബാമ പൊതുജീവിതത്തിൽ നിന്ന് വിരമിക്കാൻ പദ്ധതിയിടുന്നു. ഒരു അഭിമുഖത്തിലാണ് മിഷേൽ ഇക്കാര്യം വ്യക്തമാക്കിയത്.കൊവിഡ്കാലത്ത് സമയം ചെലവഴിക്കാനായി താൻ തുന്നൽ പഠിച്ചെന്നും ഇപ്പോൾ അതിൽ വിദ​ഗ്ദ്ധയായെന്നും മിഷേൽ അഭിമുഖത്തിൽ പറഞ്ഞു. തന്റെ നല്ലപാതിയായ ഒബാമയ്ക്ക് വേണ്ടി സ്വെറ്റർ തുന്നുന്ന തിരക്കിലാണ് മിഷേലിപ്പോൾ.

തനിക്കും ഭർത്താവിനും നഷ്ടപ്പെട്ട നല്ല ചില മുഹൂർത്തങ്ങൾ കൊവിഡ് കാലം തിരിച്ചുനൽകിയെന്ന് മിഷേൽ പറയുന്നു. മക്കളായ 22 കാരി മലിയയും 19 കാരിയായ സാഷയും മിഷേലിനും ഒബാമയ്ക്കും ഒപ്പം ക്വാറന്റീനിൽ കഴിയുകയായിരുന്നു.

മക്കൾ രണ്ടുപേരും പ്രായപൂർത്തിയായിരിക്കുന്നു. അവരോടൊപ്പം ചേർന്നുള്ള ഇടപഴകലുകൾ മൂലം അവരുടെ പ്രായക്കാരുടെ ചിന്തകളെ കുറിച്ച് അറിയാൻ സഹായിക്കുന്നുണ്ട്. ഞാൻ എന്റെ മക്കളോട് പറയാറുണ്ട്, ഞാൻ റിട്ടേർമെന്റിലേക്ക് നീങ്ങിക്കൊണ്ടിരിക്കുകയാണ്. ജോർജ് ഫ്ളോയിഡ് കൊലപാതകവും ലോക്ക്ഡൗണും വർക്ക്ഔട്ട് മുടങ്ങിയതുമൊക്കെ എനിയ്ക്ക് ചെറിയ തോതിൽ വിഷാദത്തിന് ഇടയാക്കിയിരുന്നു - മിഷേൽ പറയുന്നു. പ്രഥമ വനിതയായ സമയത്ത് മിഷേൽ ചെയ്തിരുന്ന വർക്ക്ഔട്ടുകൾ വെെറലായിരുന്നു. ലോക്ക്ഡൗൺ കാലത്ത് നീന്തലിലായിരുന്നു മിഷേൽ ശ്രദ്ധ പതിപ്പിച്ചിരുന്നത്. മിഷേലിന്റെ പുതിയ നെറ്റ്ഫ്ളിക്സ് ചിൽഡ്രൻസ് ഷോ വാഫിൾസ് പ്ലസ് മോച്ചി ഇക്കഴിഞ്ഞ ചൊവ്വാഴ്ച പുറത്തിറക്കിയിരുന്നു