ഗായകനും നടനുമായ വിനീത് ശ്രീനിവാസന്റെ ഗാനാലാപനത്തെ വിമർശിച്ചുകൊണ്ട് ഫേസ്ബുക്ക് പോസ്റ്റിട്ട ഇടത് നിരീക്ഷകൻ റെജി ലൂക്കോസിനെതിരെ ട്രോൾ പൂരം. വിനീതിന്റെ പാട്ടുകൾ അരോചകമാണെന്നും 'കൊയ കൊയ' എന്ന് കൊഞ്ചിക്കൊണ്ടുള്ളതാണെന്നുമായിരുന്നു അദ്ദേഹത്തിന്റെ പരിഹാസം. വിനീതിന്റെ ഗാനങ്ങൾ മലയാള സംഗീതത്തിനും ഭാഷയ്ക്കും അപമാനമെന്നും വിനീതിന് സംഗീതം എന്തെന്ന് അറിയില്ലെന്നും അദ്ദേഹം മറ്റുള്ളവരുടെ അവസരങ്ങൾ നഷ്ടപ്പെടുത്തുകയാണെന്നും റെജി ലൂക്കോസ് കുറ്റപ്പെടുത്തുന്നുണ്ട്.

ഫേസ്ബുക്കിലാണ് അദ്ദേഹം ഇക്കാര്യം പോസ്റ്റ് ചെയ്തത്. ഏതായാലും സംഗതി വൈറലായി മാറിയതോടെ വിമർശനവുമായി നിരവധി പേർ എത്തി. 'എന്നാൽ പിന്നെ നിങ്ങൾ പാടുന്നത് കേൾക്കട്ടെ' എന്നും 'താൻ ആരാണ്' എന്നും മറ്റുമാണ് വിനീത് ആരാധകർ റെജിയുടെ പോസ്റ്റിനു കീഴിലായി കമന്റിടുന്നത്. ഇക്കൂട്ടത്തിൽ അസഭ്യം പറയുന്നവരുമുണ്ട്.

ഇതുമായി ബന്ധപ്പെട്ട് സംഗീത സംവിധായകനായ കൈലാസ് മേനോൻ പ്രതികരണവുമായി എത്തിയിട്ടുണ്ട്. 18 വർഷമായി സംഗീത സംവിധായകർ അദ്ദേഹത്തെ പാടാൻ വിളിക്കുന്നുണ്ടെങ്കിൽ അത് അദ്ദേഹത്തിന്റെ കഴിവ് കൊണ്ടുതന്നെയാണെന്നും വിനീതിന്റെ പാട്ടുകൾ ഇഷ്ടപ്പെടുന്ന ലക്ഷക്കണക്കിന് ആളുകൾ ഉണ്ടെന്നും റെജിയുടെ വിമർശനത്തിന് മറുപടിയായി കൈലാസ് തന്റെ സോഷ്യൽ മീഡിയാ ഹാൻഡിലിൽ കുറിച്ചു.

റെജി ലൂക്കോസിന്റെ പോസ്റ്റ്

എന്നോട് ആരെങ്കിലും എനിക്ക് ഏറ്റവും അരോചകമായത് എന്തെന്നു ചോദിച്ചാൽ ഈ മനുഷ്യന്റെ (വിനീത് ശ്രീനിവാസൻ) പാട്ടുകേൾക്കുന്നതാണന്ന് നിസ്സംശയം പറയും. കൊയ കൊയ കൊഞ്ചിക്കൊണ്ടുള്ള ഇദ്ദേഹത്തിന്റെ പാട്ടുകൾ മലയാളസംഗീതത്തിനും ഭാഷയ്ക്കും അപമാനമാണ്. എന്തു ചെയ്യാം സകല പാട്ടുകളും പാടുന്നത് ഈ സംഗീതം എന്തെന്നറിയാത്ത മനുഷ്യനാണന്നതാണ് കാലഘട്ടത്തിന്റെ ഗതികേടും നാണക്കേടും. മുഴുവൻ പാട്ടുകളും ഇങ്ങേർ പാടുന്നത് എന്ത് അഡ്ജസ്റ്റുമെണ്ടാണ്. എത്രയോ മിടുമിടുക്കരുടെ അവസരമാണ് ഈ ലോബിയിങ്‌കാരൻ തകർക്കുന്നത്.
-റെജി ലൂക്കോസ്.

കൈലാസ് മേനോന്റെ പോസ്റ്റ്

ആദ്യമായി വിനീതിന്റെ പാട്ട് റെക്കോർഡ് ചെയ്യുന്നത് 3 മാസം മുമ്പാണ്. എന്നെ അത്ഭുതപ്പെടുത്തിക്കൊണ്ട് ഒരു മണിക്കൂർ പോലും എടുക്കാതെ പാടി തീർത്തു... ഞാൻ ചെയ്തിട്ടുള്ളതിൽ ഏറ്റവും വേഗമേറിയ റെക്കോർഡിങ് സെഷൻ ആയിരുന്നു അത്. പാടുന്ന ഭൂരിഭാഗം ടേക്കുകളും പെർഫെക്റ്റ് ആയിരുന്നു എന്നത് കൊണ്ടാണ് അത്രയും വേഗം റെക്കോർഡിങ് കഴിഞ്ഞത്. സിനിമ മേഖലയിലെ ബന്ധങ്ങളും അടുപ്പങ്ങളുമെല്ലാം വച്ച് ഒന്നോ രണ്ടോ മൂന്നോ പാട്ടുകൾ പാടാം, പക്ഷെ 18 വർഷമായി സംഗീത സംവിധായകർ അദ്ദേഹത്തെ പാടാൻ വിളിക്കുന്നുണ്ടെങ്കിൽ കഴിവ് എന്നൊരു സംഭവം ഉള്ളത് കൊണ്ട് തന്നെയാണ്. അദ്ദേഹത്തിന്റെ പാട്ടുകൾ ഇഷ്ടപ്പെടുന്ന ലക്ഷക്കണക്കിന് ആളുകൾ ഉള്ളത് കൊണ്ടും കൂടിയാണ്.