തൃശൂർ: ഗുരുവായൂർ ക്ഷേത്രം മേൽശാന്തിയായി ഒറ്റപ്പാലം വരോട് തിയ്യന്നൂർമന ശങ്കരനാരായണ പ്രമോദ് തിരഞ്ഞെടുക്കപ്പെട്ടു. ആകെ അപേക്ഷിച്ച 43 പേരിൽ യോഗ്യത നേടിയ 36പേരിൽ നിന്ന് മേൽശാന്തി മൂർത്തിയേടത്ത് കൃഷ്‌ണൻ നമ്പൂതിരിയാണ് പുതിയ മേൽശാന്തിയെ തിരഞ്ഞെടുത്തത്.

ഉച്ചപൂജയ്‌ക്ക് ശേഷം നടന്ന നറുക്കെടുപ്പിൽ ശങ്കരനാരായണ പ്രമോദ് തിരഞ്ഞെടുക്കപ്പെടുകയായിരുന്നു. ഏപ്രിൽ ഒന്നുമുതൽ ആറ് മാസത്തേക്കാണ് പുതിയ മേൽശാന്തിയുടെ കാലാവധി. ഒ‌റ്റപ്പാലം വരോട് ചാത്തൻകാട് ദേവീക്ഷേത്ര മേൽശാന്തിയാണ് നിലവിൽ ശങ്കരനാരായണ പ്രമോദ്. ആദ്യമായാണ് അദ്ദേഹം ഗുരുവായൂർ മേൽശാന്തി പദവിയിലെത്തുന്നത്.

തിയ്യന്നൂർ ശങ്കരനാരായണ ഉണ്ണി നമ്പൂതിരിയുടെയും എടപ്പാൾ കുന്നത്ത്മന ശാന്ത അന്തർജനത്തിന്റെയും മകനാണ് പ്രമോദ്. വരോട് യു.പി സ്‌കൂളിലെ അദ്ധ്യാപികയായ രശ്‌മി അന്തർജനമാണ് ഭാര്യ. ഋഷികേശ്, ഹരികേശ് എന്നിവർ മക്കളാണ്.