ഗുരുതര സന്ധിവേദനയ്ക്ക് സന്ധിമാറ്റിവയ്ക്കൽ ശസ്ത്രക്രിയയാണ് ആശ്വാസത്തിനുള്ള ഏകമാർഗം എന്ന് കരുതേണ്ടതില്ല. സന്ധിമാറ്റിവയ്‌ക്കൽ ശസ്ത്രക്രിയ വേണ്ടിവരുമെന്ന തെറ്റായ ധാരണകൊണ്ട് പലരും നേരത്തേതന്നെ സന്ധി വേദനയ്ക്ക് ചികിത്സ തേടാറില്ല. ശസ്ത്രക്രിയയും അല്ലാതെയുള്ള ചികിത്സകളും സന്ധി പരിചരണത്തിന് നിലവിലുണ്ട്.

സന്ധിവേദനയ്ക്കുള്ള കാരണങ്ങൾ:
സന്ധിവേദന ചിലപ്പോൾ പെട്ടെന്ന് അനുഭവപ്പെട്ടേക്കാം. അല്ലെങ്കിൽ വേദന പതിയെ ആരംഭിച്ച് പിന്നീട് കൂടിയേക്കാം.
• ദശനാരിന്റെ നാശം (റ്റെൻഡോനൈറ്റിസ്)
• ബുർസൈറ്റിസ്
• പേശി വലിവ്
• മെനിസ്‌കസ് / ലാബ്രം കാർട്ടിലേജ്
• സന്ധിവാതം
• വീഴ്‌ചയാലുള്ള മുറിവ് / എല്ലിനുണ്ടാകുന്ന അപകടം/ കോശങ്ങൾക്കുണ്ടാകുന്ന മുറിവ്
• കാർട്ടിലേജ് നഷ്ടമാകുക
• ഓസ്‌റ്റിയോനെക്രോസിസ്
• പാരമ്പര്യ സന്ധി വൈകല്യം
സന്ധി സംബന്ധമായ ഭൂരിഭാഗം പ്രശ്‌നങ്ങൾക്കും ശസ്ത്രക്രിയ ആവശ്യമില്ല. മുട്ടിലെ തേയ്‌മാനത്തിനു പോലും ശസ്ത്രക്രിയ ആദ്യം പരിഗണിക്കേണ്ടതില്ല. യുവത്വ കാലഘട്ടത്തിലോ, സജീവമായി പ്രവർത്തിക്കുന്ന അവസരത്തിലോ പ്രത്യേകിച്ച് ഇതിന്റെ ആവശ്യം വരുന്നില്ല.

സന്ധി പരിചരണം? ആവശ്യകത?

സന്ധിയിലുണ്ടാകാൻ സാധ്യതയുള്ള മുറിവുകളെ പ്രതിരോധിച്ച്, വീക്കം കുറച്ച്, കാർട്ടിലേജിനെ സംരക്ഷിക്കുകയാണ് വേണ്ടത്. താഴെ സൂചിപ്പിച്ചിരിക്കുന്ന ഘടകങ്ങളുടെ അടിസ്ഥാനത്തിൽ ഡോക്ടറാണ് സന്ധി സംബന്ധമായ ചികിത്സകൾക്ക് തീരുമാനമെടുക്കേണ്ടത്.
• വയസ്സ് : ചെറുപ്പം അനുസരിച്ച് പരിചരണമാർഗങ്ങൾ വിജയകരമാകും.
• ഭാരം: ഭാരം കൂടുന്നതിനനുസരിച്ച് പേശികളുടെ വലിവ് കൂടും. മെലിയുന്തോറും ഇടുപ്പ് / മുട്ട് / കണങ്കാൽ എന്നിവയിൻമേലുള്ള സമ്മർദ്ദം കുറയും. മെലിയുന്നത് സന്ധിവാതം കുറയ്ക്കുന്നതിനുള്ള ഏറ്റവും മികച്ച മാർഗമാണ്.
• പേശികളുടെ കരുത്തും ആരോഗ്യവും : ചലിക്കുന്നതിനുള്ള ഊർജ്ജമേകുന്നത് പേശികളാണ്. പേശികൾ സന്ധി സംരക്ഷണത്തിനായി പുറമേ നിന്നുള്ള ആഘാതങ്ങളെ നേരിടുകയും ചെയ്യുന്നു. പേശികളുടെ കരുത്തും അയവും വർദ്ധിപ്പിക്കുന്നത് സന്ധിവലിവും വേദനയും കുറയ്ക്കാൻ സഹായകമാണ്.
• തീവ്രത: അസ്ഥിയായി പരിണമിക്കുന്ന ദേഹമൂല പദാർത്ഥം (കാർട്ടിലേജ്) കുറയുന്ന അവസരങ്ങളിൽ ചെറിയ പ്രക്രിയയിലൂടെ അത് വീണ്ടെടുക്കാനാകും. എന്നാൽ കാർട്ടിലേജ് പൂർണമായും നശിച്ചാൽ ശസ്ത്രക്രിയ മാത്രമല്ല, ചില ഇൻജക്ഷനുകളും ഇതിന് സഹായകമാകും.
• സ്ഥാനം: കൂടുതൽ സന്ധി പരിചരണ വിദ്യകളും കാൽമുട്ടിനെ കേന്ദ്രീകരിച്ചുള്ളതാണ്. എന്നിരുന്നാൽ ഇടുപ്പ്്, തോൾ മാറ്റിവയ്ക്കുന്നതിനും സംവിധാനങ്ങളുണ്ട്.

സന്ധി വേദനയ്ക്കുള്ള ശസ്ത്രക്രിയേതര ചികിത്സ

1. ഇൻജക്ഷനുകൾ

ഹൈലൂറോണിക് ആസിഡ്, കോർട്ടികോസ്റ്റീറോയിഡ് എന്നിവ കുത്തിവയ്ക്കുന്നത് പല രോഗികളിലും സന്ധിവീക്കം കുറയ്ക്കും. ഈ ചികിത്സ ഭൂരിഭാഗം സന്ധികൾക്കും അനുയോജ്യമാണെന്നാണ് പഠനങ്ങൾ തെളിയിച്ചിട്ടുള്ളത്. എന്നിരുന്നാലും ഫലം സമ്മിശ്രമാണ്. ഇൻഷുറൻസ് നൽകുന്നവരിൽ ഏറെപ്പേരും ഈ ഇൻജെക്ഷനുകൾ ഉൾപ്പെടുത്തിയിട്ടില്ല.

2. പ്ലേറ്റ്ലറ്റുകളാൽ സമ്പന്നമായ പ്ലാസ്‌മയും നൂതന ബയോളജിക് ഇൻജക്ഷനുകളും

ഓരോ മില്ലി ലിറ്റർ രക്തത്തിലും ആയിരക്കണക്കിന് പ്ലേറ്റ്ലറ്റുകൾ അടങ്ങിയിട്ടുണ്ട്. കോശങ്ങളുടെ കേടുമാറ്റുന്നതിനും വീക്കം കുറയ്ക്കുന്നതിനും സുഖപ്പെടുത്തുന്നതിനും ഉത്തേജനം നൽകുവാനുള്ള കെമിക്കലുകൾ ഇവയിൽ അടങ്ങിയിട്ടുണ്ട്്. ഇക്കാരണത്താൽ സന്ധി വീക്കത്തിനും ലിഗമെന്റ്, പേശി, സന്ധി സംബന്ധമായ പ്രശ്നങ്ങൾക്കും രക്തത്തിലെ പ്ലേറ്റ്ലറ്റുകളടങ്ങിയ പ്ലാസ്മ കുത്തിവയ്ക്കാറുണ്ട്. സ്റ്റെം സെല്ലുകൾ ഉൾപ്പെടെ നൂതന ബയോളജിക് ഇൻജക്ഷനുകളും ലഭ്യമാണ്. (ഇവ അധികം പഠന വിധേയമായിട്ടില്ല). ഈ പദാർത്ഥങ്ങളിൽ സമാന വളർച്ചാ ഘടകങ്ങളും വേദന ഇല്ലാതാക്കുന്ന ചില കോശങ്ങളും ഉൾപ്പെടുന്നു.

3. കാർട്ടിലേജ് മാറ്റിവയ്ക്കൽ

കാർട്ടിലേജ് നഷ്ടപ്പെട്ടിടത്ത് പുതിയത് വയ്ക്കുയോ അല്ലെങ്കിൽ പുതിയത് രൂപപ്പെടുന്നതിന് സാഹചര്യമുണ്ടാക്കുയോ ചെയ്യുന്നു. ഇത് എല്ലിലെ കാർട്ടിലേജ് വളരുന്നതിന് ഉണർവ്വേകും. ഈ രീതി തെളിയിക്കപ്പെട്ടിട്ടില്ല. കൂടുതൽ പരീക്ഷണം ഈ മേഖലയിൽ ആവശ്യമാണ്.

4. ഭാഗികമായി മാറ്റിവയ്ക്കൽ

സന്ധിയിൽ ചെറിയ തോതിൽ പ്രശ്നമുള്ളപ്പോഴാണ് ഡോക്ടർമാർ ഈ മാർഗം തിരഞ്ഞെടുക്കുന്നത്. സന്ധിയുടെ നിർദ്ദിഷ്ട സ്ഥാനത്ത് ചെറിയ കൃത്രിമ ഭാഗങ്ങൾ വച്ച് എല്ലിനെ സംരക്ഷിക്കാനാകുമെന്നതാണ് ഇതിന്റെ നേട്ടം. നിരവധി സന്ധികളിൽ ഈ ചികിത്സ നടത്താമെങ്കിലും സൂക്ഷ്മത അനിവാര്യമാണ്. എല്ലാവരിലും വിജയകരമാകണമെന്നില്ല. സന്ധിയുടെ ഒരു ഭാഗം മാറ്റിവച്ചു എന്നതുകൊണ്ട് മറ്റു ഭാഗത്തുള്ള സന്ധിയുടെ നാശത്തെ പ്രതിരോധിക്കാനാവില്ല. ഭാഗികമായ മാറ്റിവയ്ക്കലിലൂടെ ദീർഘനാളത്തെ ഫലം ലഭിക്കുകയുമില്ല. ഇതിനുശേഷം ഭാവിയിൽ മുഴുവൻ സന്ധി മാറ്റിവയ്ക്കാനാകും.

സന്ധിപരിചരണത്തിനുള്ള ശസ്ത്രക്രിയകൾ

1. ഓസ്റ്റിയോടൊമി
കാൽമുട്ടിന്റെ ഒരു ഭാഗത്ത് മാത്രം സന്ധിവാതമുണ്ടെങ്കിലാണ് ഡോക്ടർമാർ ഓസ്റ്റിയോടൊമി നിർദേശിക്കുക. കാർട്ടിലേജ് സർജറി, വളഞ്ഞ കാൽ, കാൽമുട്ട് കൂട്ടിമുട്ടൽ തുടങ്ങയവയ്ക്കുള്ള സർജറിക്കൊപ്പമാണ് ഓസ്റ്റിയോടൊമി നടത്തുക.
തുടയെല്ലിലോ, ഷിൻബോണിലോ ബോൺ വെഡ്ജ് കൂട്ടിച്ചേർക്കുകയോ, ഊരിമാറ്റുകയോ ചെയ്യുന്ന ശസ്ത്രക്രിയയാണിത്.

2. കാർട്ടിലേജ് വീണ്ടെടുക്കൽ പ്രക്രിയ ( അലോഗ്രാഫ്റ്റ്സ്, മൈക്രോ ഫ്രാക്ചർ, ബയോളജിക് ഗ്രാഫ്റ്റസ് ഉൾപ്പെടെ)
കാൽമുട്ട് നിരപ്പില്ലാതിരിക്കുമ്പോഴും വളവുകളുള്ളപ്പോഴും മുട്ട് മാറ്റിവയ്ക്കൽ ശസ്ത്രക്രിയ ഒഴിവാക്കാനാണ് കാർട്ടിലേജ് വീണ്ടെടുക്കുന്നതിനുള്ള പ്രക്രിയ നടത്തുന്നത്. അൻപത് വയസ്സിനു താഴെയുളളവരിലും സജീവമായ വ്യക്തികളിലും ഇത് ഫലപ്രദമാണ്. എല്ലുകളെ സംരക്ഷിക്കുന്ന ഉറച്ച, സുഗമമായ, വഴുക്കുള്ള കവചമാണ് ആർട്ടിക്കുലർ കാർട്ടിലേജ്. കാർട്ടിലേജിനുണ്ടാകുന്ന മുറിവ് വേദനയ്ക്കും നീരിനും കാരണമാകുന്നു. കാർട്ടിലേജിന് ഭാഗികമായോ , പൂർണമായോ മുറിവുണ്ടാകുന്നത് മറ്റു പ്രശ്നങ്ങൾക്ക്് കാരണമാകുന്നു.
കാൽമുട്ടിന് തേയ്മാനം ഉണ്ടാകുന്നതിന്റെ അവസാന ഘട്ടത്തിൽ മറ്റു മാർഗ്ഗങ്ങൾ പരാജയപ്പെടുമ്പോഴാണ് സന്ധിമാറ്റിവയ്ക്കൽ ശസ്ത്രക്രിയ നടത്തുക. കാൽമുട്ട്, ഇടുപ്പ്, തോൾ, കണങ്കാൽ എന്നിവിടങ്ങളിലെ ഭൂരിഭാഗം സന്ധി പ്രശ്നങ്ങളും മുറിവ് അധികം ഇല്ലാത്ത പ്രക്രിയകളിലൂടെ ചികിത്സിക്കാനാകും.

സന്ധി പൂർണമായും മാറ്റിവയ്ക്കുന്നതിലുള്ള നേട്ടം:

കാർട്ടിലേജ് നശിച്ചാലോ, എല്ലിന് മറ്റു ബുദ്ധിമുട്ടുകളുണ്ടെങ്കിലോ സന്ധി മാറ്റിവയ്ക്കൽ ഫലപ്രദമാണ്. നൂതന സങ്കേതങ്ങളിലൂടെ ഇടുപ്പ്, തോൾ, കാൽമുട്ട് എന്നിവിടങ്ങളിലെ വേദനയ്ക്ക് ആശ്വസം ലഭിക്കുന്നതിനും പ്രവർത്തനം മെച്ചപ്പെടുത്തുന്നതിനും കഴിയും. എന്നിരുന്നാലും ശസ്ത്രക്രിയക്ക് അതിന്റേതായ സങ്കീർണതകളും ഉണ്ട്.

നിങ്ങളുടെ പ്രശ്നത്തിന് അനുയോജ്യ ദീർഘകാല പരിഹാരവും മികച്ച പ്രതിവിധിയും ഡോക്ടറിൽ നിന്നും മനസ്സിലാക്കുക. നിങ്ങളുടെ സന്ധിയും പ്രവർത്തനങ്ങളും ജീവിതശൈലിയും സംരക്ഷിക്കുന്നതാകട്ടെ അന്തിമ ലക്ഷ്യം.

ഡോ. മുഹമ്മദ് നസീർ
സീനിയർ കൺസൾട്ടന്റ് & ഗ്രൂപ്പ് കോ-ഓർഡിനേറ്റർ
ഓർത്തോപീഡിക്സ് & ട്രോമ

കിംസ്‌ഹെൽത്ത്
തിരുവനന്തപുരം