തിരുവനന്തപുരം: സംസ്ഥാനത്തെ കൊവിഡ‌് വ്യാപനത്തിൽ ശമനം കണ്ടുതുടങ്ങിയിരിക്കെ, ജില്ലയിൽ ടെസ്റ്റ് പോസിറ്രിവിറ്റി റേറ്റ് (ടി.പി.ആർ) 2020 ജൂലായ് മാസത്തിനുശേഷം ഇതാദ്യമായി മൂന്നിന് താഴെയത്തി. എട്ട് മാസത്തെ താഴ്ന്ന നിലയാണ് ഇപ്പോഴത്തേത്. ഈ മാസത്തെ ആദ്യ രണ്ട് ആഴ്ചയിൽ 2.5 ഉം 2.9 ഉം ആയിരുന്നു ടി.പി.ആർ. സംസ്ഥാനത്തെ ടി.പി.ആറിനെക്കാൾ കുറവാണ് ഇത്. ഫെബ്രുവരി അവസാന ആഴ്ചയ്ക്കും മാർച്ച് രണ്ടാം വാരത്തിനും ഇടയിൽ ആഴ്ചയിലെ ടി.പി.ആർ 4.5നും 3.6നും ഇടയിലായിരുന്നു.

ജനുവരി അവസാന ആഴ്ചയോടെയാണ് ജില്ലയിലെ ടി.പി.ആർ ഉയരാൻ തുടങ്ങിയത്. അന്ന് 4.9നും 6.5നും ഇടയിലായിരുന്നു ടി.പി.ആറിന്റെ ചലനം. എന്നാൽ, പിന്നീട് അവിടെനിന്ന് ടി.പി.ആർ ക്രമേണ താഴുകയായിരുന്നു. മാർച്ച് ആദ്യവാരം ടി.പി.ആർ 6.3നും 2.5നും ഇടയിലായി.

ഇക്കഴിഞ്ഞ ഞായറാഴ്ചത്തെ കണക്ക് അനുസരിച്ച് ആർ.ടി.പി.സി.ആർ പരിശോധനയുടെ അടിസ്ഥാനത്തിലുള്ള ടെസ്റ്റ് പോസിറ്റിവിറ്റി നിരക്ക് 6.6 ശതമാനം ആണ്. ആന്റിജൻ പരിശോധന പ്രകാരമുള്ള ടി.പി.ആർ 11.1 ശതമാനവും ആണ്. കഴിഞ്ഞ രണ്ടാഴ്ചയ്ക്കിടെ പ്രതിദിന ടി.പി.ആർ അഞ്ച് ശതമാനത്തിന് താഴെയായി തുടരുകയാണ്. ഫെബ്രുവരി 28ന് ടി.പി.ആർ 3.26 ശതമാനം ആയിരുന്നു. മാർച്ച് 7ന് ടി.പി.ആർ 4.25 ശതമാനത്തിലേക്ക് എത്തിയെങ്കിലും അഞ്ച് ശതമാനത്തിന് താഴെയായി തന്നെ നിന്നു. ജില്ലയിൽ ഏറ്റവും കുറഞ്ഞ ടി.പി.ആർ രേഖപ്പെടുത്തിയത് ഈ മാസം മൂന്നിനായിരുന്നു, 2.5 ശതമാനം.കഴിഞ്ഞ ജൂലായ് മുതൽ തീരപ്രദേശത്തെ ടി.പി.ആറും ഉയർന്ന് തന്നെയാണ് നിന്നത്. സാമൂഹിക വ്യാപനം സർക്കാർ സ്ഥിരീകരിച്ചപ്പോഴും ഇത് തന്നെയായിരുന്നു അവസ്ഥ. ആഗസ്റ്റ് അവസാന ആഴ്ചയോടെ നിരക്ക് കുറയാൻ തുടങ്ങി. എന്നാൽ ഇതിന് കാരണം പരിശോധനയ്ക്ക് ജനങ്ങൾ വിസമ്മതിച്ചതിനെ തുടർന്നായിരുന്നു. 2020 ജൂലായ് ഒന്നു മുതൽ ആഗസ്റ്ര് 22 വരെ തീരപ്രദേശത്തെ 11 പഞ്ചായത്തുകളിലായി 4895 കൊവിഡ് പോസിറ്റീവ് കേസുകളാണ് റിപ്പോർട്ട് ചെയ്തത്. ഇക്കാലയളവിൽ 28,769 സാമ്പിളുകളാണ് പരിശോധിച്ചത്. ടി.പി.ആർ 17 ശതമാനവും ആയിരുന്നു. തീരദേശത്തെ നാല് ക്ളസ്റ്ററുകളിലായി പോസിറ്റിവിറ്റി നിരക്ക് 20 ശതമാനവുമായി. പൂന്തുറ (20.4%), പുല്ലുവിള (29.1%), അഞ്ചുതെങ്ങ് (23.6%), പൂവാർ (21.2%) എന്നിങ്ങനെയാണ് ക്ളസ്റ്റുകളിൽ രേഖപ്പെടുത്തിയ ടി.പി.ആർ.

ഡിസംബർ രണ്ടാം വാരം ആയപ്പോഴേക്കും ആർ.ടി.പി.സി.ആർ പരിശോധന അടിസ്ഥാനമാക്കിയുള്ള ടി.പി.ആർ അ‌ഞ്ചിൽ താഴേക്കെത്തി. ഡിസംബറിലെ ആദ്യ രണ്ടാഴ്ച ടി.പി.ആർ 4.4നും 4.2നും ഇടയിലുമായിരുന്നു. ടി.പി.ആർ അഞ്ചിൽ താഴെ എത്തിയാൽ കൊവിഡ് നിയന്ത്രണവിധേയമാണെന്നാണ് കണക്ക്.

2020 ജൂലായ് മൂന്നാം വാരം ജില്ലയിലെ ടി.പി.ആർ 9.2 ശതമാനം ആയിരുന്നു. ആഗസ്റ്റ് ആയപ്പോഴേക്കും ഇത് 17.9 ശതമാനത്തിലെത്തി. ഓണത്തിന് ശേഷം ടി.പി.ആർ വീണ്ടും ഉയർന്നു. സെപ്തംബർ നാലാമത്തെ ആഴ്ചയിൽ 17.5 ശതമാനം ആയി. നവംബർ രണ്ടാമത്തെ ആഴ്ചയിൽ കുറയാൻ തുടങ്ങിയ ടി.പി.ആർ ക്രമേണ ഇപ്പോഴത്തെ നിലയിലേക്ക് എത്തുകയായിരുന്നു.