ലോക സിനിമാ ആസ്വാദകർ ഉറ്റുനോക്കുന്ന 74ാമത് കാൻ ഫിലിം ഫെസ്റ്റിവലിന്റെ ജൂറിയിൽ ആദ്യത്തെ കറുത്തവർഗക്കാരനായ പ്രസിഡന്റായി സംവിധായകനും ആക്ടിവിസ്റ്റുമായ സ്‌പൈക്ക് ലീ മാറി. കാൻ ഫിലിം ഫെസ്റ്റിവലിന്റെ ചരിത്രത്തിലാദ്യമായി കറുത്ത വർഗക്കാരൻ ജൂറി അംഗമാകുന്നത്. താൻ കഴിഞ്ഞ വർഷവും ഫെസ്റ്റിവലിന്റെ നേതൃ സ്ഥാനത്ത് ഇരിക്കാൻ തയ്യാറായിരുന്നുവെങ്കിലും കൊവിഡ് പ്രതിസന്ധിയിൽ ഫെസ്റ്റിവൽ നടക്കാതെ പോയെന്നും ലീ പറഞ്ഞു. ഈ ഒരു തിരഞ്ഞെടുപ്പിനെ പ്രശംസിച്ചുകൊണ്ട് നിരവധിപേരാണ് രംഗത്ത് വന്നിരിക്കുന്നത്.

''ഞങ്ങൾ കടന്നുപോയ അനിശ്ചിതത്വത്തിലുടനീളം സ്‌പൈക്ക് ലീ നിങ്ങൾ ഞങ്ങളെ പ്രോത്സാഹിപ്പിച്ചുകൊണ്ടിരുന്നു. പ്രതിസന്ധികളെ തരണം ചെയ്യാൻ സാധിക്കുമെന്ന് ആത്മവിശ്വാസം നൽകി. '' പ്രസിഡന്റ് സ്ഥാനത്തേക്ക് എത്തിയ സ്‌പൈക്ക് ലീയെ ആശംസിച്ച് കാൻ സംഘാടക സമിതി ട്വീറ്റ് ചെയ്തു. എല്ലാ വർഷവും മേയിൽ നടക്കുന്ന ഫെസ്റ്റിവൽ ഇക്കുറി ജൂലൈ 6-മുതൽ 17 വരെയായിരിക്കും നടക്കുക. ലീ യുടെ നിരവധി സിനിമകൾ കാൻ ഫെസ്റ്റിവലിൽ പ്രദർശിപ്പിച്ചിട്ടുണ്ട്. 1989 ൽ ഡു ദി റൈറ്റ് തിംഗ് മുതൽ 2018 ൽ പ്രദർശിപ്പിച്ച ബ്ലാക്ക്ക്ലാൻസ്മാനിൻ ഗ്രാൻഡ് പ്രിക്‌സ് നേടിയിരുന്നു.