ലണ്ടൻ: വർഷങ്ങൾക്ക് മുമ്പ് സ്കൂൾ മൈതാനത്ത് കളിച്ചുല്ലസിക്കുന്നതിനിടെ ചില വിദ്യാർത്ഥികൾ തങ്ങൾ കണ്ട ഒരു അത്ഭുത കാഴ്ച പേപ്പറിൽ കോറിയിട്ടു. 1977ൽ ചെഷയറിലെ മാക്ക്​ൾസ്​ഫീൽഡിൽ അപ്​റ്റൺ പ്രയറി സ്​കൂളിലെ വിദ്യാർത്ഥികൾ വരച്ച ചിത്രങ്ങൾ കണ്ട് ലോകമൊന്നാകെ ഞെട്ടി. കാരണമത്, പറക്കും തളികകളുടെ ചിത്രങ്ങളായിരുന്നു. പറക്കുംതളിക കണ്ടെന്ന് അദ്ധ്യപകരോട് വിദ്യാർത്ഥികൾ പറഞ്ഞതോടെയാണ് സംഭവത്തിന് ചൂട് പിടിച്ചത്. ഉച്ചഭക്ഷണ ഇടവേളയിൽ മരങ്ങൾക്ക്​ തൊട്ടുമുകളിൽ ഏതോ ബഹിരാകാശ പേടകം വന്ന്​ വട്ടംപറന്ന്​ മടങ്ങുകയായിരുന്നുവെന്നാണ് ഇവർ അദ്ധ്യാപകരോട് പറഞ്ഞത്. അവിശ്വസനീയമായ സംഭവമായതിനാൽ, കുട്ടികളെ പല സംഘങ്ങളായി മാറ്റിനിറുത്തി അവർ കണ്ടത്​ ചിത്രത്തിൽ പകർത്താൻ അദ്ധ്യാപകർ നിർദ്ദേശിച്ചു. വിദ്യാർത്ഥികൾ വരച്ച ചിത്രങ്ങൾ ഒന്നിച്ച്​ കണ്ടപ്പോൾ​ അദ്ധ്യാപകരും ഞെട്ടി​. അവർ വരച്ച ചിത്രങ്ങൾ ഏകദേശം ഒരുപോലെയായിരുന്നു. ചിത്രങ്ങൾ അദ്ധ്യാപകർ പൊലീസിന്​ കൈമാറി. പൊലീസ് ചിത്രങ്ങൾ പ്രതിരോധ മന്ത്രാലയത്തിനു കീഴിലെ അന്യഗ്രഹ ജീവി പഠന വിഭാഗത്തിന് നൽകി. മന്ത്രാലയം കേസ് അന്വേഷിച്ചുവെങ്കിലും ഒന്നും കണ്ടെത്താനായില്ല. 2009ൽ ഷെഫീൽഡ്​ ഹാലം യൂനിവേഴ്​സിറ്റിയിലെ ഡോ. ഡേവിഡ്​ ക്ലാർക്​ ഈ ചിത്രങ്ങൾ പിന്നീട്​ ഒരു പുസ്​തകത്തിലും ഉപയോഗിച്ചു. പതിറ്റാണ്ടുകൾ പിന്നിട്ടുവെങ്കിലും ബ്രിട്ടീഷുകാർ ഇന്നും ഈ സംഭവത്തിന്റെ പൊരുളറിയാൻ ആകാഷയോടെ കാത്തിരിക്കുകയാണ്.