കണ്ണൂർ: മുഖ്യമന്ത്രി പിണറായി വിജയനെതിരെ ധർമ്മടത്ത് മത്സരിക്കാൻ തയ്യാറാണെന്ന് കോൺഗ്രസ് നേതാവ് കെ. സുധാകരൻ എം.പി. പ്രാദേശിക നേതാക്കളും പ്രവർത്തകരും തന്നോട് ഇക്കാര്യം ശക്തമായി ആവശ്യപ്പെടുന്നുണ്ടെന്ന് പറഞ്ഞ സുധാകരൻ ഉമ്മൻചാണ്ടിയുമായി ഈ വിഷയം സംസാരിച്ചതായും വ്യക്തമാക്കി.

ഹൈക്കമാൻഡ് ആവശ്യപ്പെട്ടാൽ മുഖ്യമന്ത്രിക്കെതിരെ മത്സരിക്കാമെന്ന് സുധാകരൻ വ്യക്തമാക്കിയതോടെ ധർമ്മടത്തെ കോൺഗ്രസ് സ്ഥാനാർത്ഥിയെ ചൊല്ലിയുളള ചർച്ചകൾ കൂടുതൽ സജീവമായി. ഫോർവേർഡ് ബ്ലോക്കിന് നൽകിയിരുന്ന ധർമ്മടം സീറ്റ് കോൺഗ്രസ് തിരിച്ചെടുത്തങ്കിലും അവിടെ സ്ഥാനാർത്ഥിയെ കണ്ടെത്താൻ പാർട്ടി നേതൃത്വത്തിന് ഇതുവരെയും കഴിഞ്ഞിട്ടില്ല. കോൺഗ്രസ് മത്സരിക്കുന്ന മറ്റു മണ്ഡലങ്ങളിലെ സ്ഥാനാർത്ഥികളെയെല്ലാം കഴിഞ്ഞ ദിവസത്തോടെ പ്രഖ്യാപിച്ചിരുന്നു.

മുഖ്യമന്ത്രിക്കെതിരെ സ്വതന്ത്ര സ്ഥാനാർത്ഥിയായി മത്സരിക്കുന്ന വാളയാർ പെൺകുട്ടികളുടെ അമ്മയ്ക്ക് പിന്തുണ നൽകാൻ യു.ഡി.എഫ് ആലോചിക്കുന്നതായ വാർത്തകൾ പുറത്തുവന്നിരുന്നു. എന്നാൽ വാളയാർ പെൺകുട്ടികളുടെ അമ്മയെ യു.ഡി.എഫ് പിന്തുണക്കുകയാണെങ്കിൽ വിമതനായി മത്സരിക്കുമെന്ന് വ്യക്തമാക്കി ഡി.സി.സി ജനറൽ സെക്രട്ടറി സി. രഘുനാഥ് രംഗത്തെത്തിയിരുന്നു.