ടെൽ അവീവ്​: ചാവുകടൽ ചുരുളുകൾ വീണ്ടും കണ്ടെത്തിയെന്ന് ഇസ്രയേൽ പുരാവസ്തു അതോറിറ്റി. രണ്ടാം നൂറ്റാണ്ടിലേതെന്ന്​ കരുതുന്ന ചുരുളുകൾ ജൂഡിയൻ മരുഭൂമിയിലെ ഗുഹയിൽ നിന്ന്​ വീണ്ടെടുത്തതാണെന്ന് ഗവേഷകർ പറയുന്നു.

ഏറ്റവും പഴക്കമുള്ള ഹീബ്രു ലിഖിത രേഖകളാണ്​ ചാവുകടൽ ചുരുളുകൾ.

ഇവയ്ക്ക് 2000 വർഷം പഴക്കമുണ്ടെന്നാണ്​ കരുതുന്നത്​. നീണ്ട ആറു പതിറ്റാണ്ടിനു ശേഷം ആദ്യമായാണ്​ ഇവ വീണ്ടും കണ്ടെത്തുന്നത്​. 12ഓളം രേഖകൾ പുതുതായി കണ്ടെടുത്തതെന്ന് ഗവേഷകർ പറഞ്ഞു. ജൂഡിയൻ മരുഭൂമി കേന്ദ്രീകരിച്ച്​ 2017 മുതൽ ഉത്​ഖനനം നടക്കുന്നുണ്ട്​.

നാഹൽ ഹെവറിലെ കേവ്​ ഒഫ്​ ഹൊററിലാണ്​ ഇവയുണ്ടായിരുന്നതെന്ന്​ ഗവേഷകർ പറയുന്നു. വലിയ മലയിടുക്കുകളുള്ള ​പ്രദേശമായതിനാൽ അതിസാഹസികമായാണ്​ ഗവേഷകർ അകത്തെത്തുന്നത്​.