കൊൽക്കത്ത: ഐ ലീഗിൽ ഇന്ന് നടക്കുന്ന നിർണായക മത്സരത്തിൽ ഗോകുലം കേരള എഫ്.സി മുഹമ്മദൻസിനെ നേരിടും. കല്യാണി സ്റ്റേഡിയത്തിൽ വൈകിട്ട് 4 മുതലാണ് മത്സരം. വൺ സ്പോർട്സ് ചാനലിൽ മത്സരം തത്സമയം ഉണ്ടായിരിക്കും.

റിയൽ കാശ്മീരുമായിട്ടുള്ള കഴി‌ഞ്ഞ മത്സരം സമനില ആയതിനാൽ മൂന്നാം സ്ഥാനത്തു എത്തിയ ഗോകുലത്തിനു അവസാന രണ്ടു മത്സരങ്ങൾ വിജയം നേടിയാൽ കിരീട സാധ്യത നിലനിർത്താം. രണ്ടു കളികൾ ബാക്കി നിൽക്കേ ഗോകുലവും ആദ്യ രണ്ടു സ്ഥാനക്കാരും തമ്മിൽ രണ്ടു പോയിന്റ് വിത്യാസം മാത്രമാണുള്ളത്.

അതേസമയം മറുവശത്ത് ചർച്ചിലിനെ ഒന്നിന് എതിരെ നാല് ഗോളുകൾക് തോൽപിച്ച മുഹമ്മദൻസ്, വളരെ നല്ല ആത്മവിശ്വാസത്തിലാണ്. കൊൽക്കത്ത ടീമിന്റെ സ്പാനിഷ് സ്‌ട്രൈക്കർ പെഡ്രോ മാൻസി നല്ല പ്രകടനമാണ് ഇത് വരെ കാഴ്ചവെച്ചത്.

ഗോകുലം പ്രതീക്ഷ അർപ്പിക്കുന്നത് മുന്നേറ്റ നിരയിലാണ്. ഇത് വരെ ലീഗിൽ ഏറ്റവും അധികം ഗോളുകൾ (25 ) നേടിയ ടീമാണ് ഗോകുലം. ആദ്യ കളികളിൽ പ്രതിരോധത്തിലെ പാളിച്ചകളും ഗോകുലം തിരുത്തിയിരിന്നു. പ്രതിരോധത്തിൽ ഘാന താരം അവാലിന്റെ പ്രകടനം മികച്ചതായി തുടരുമ്പോൾ, മധ്യനിരയിൽ അഫ്ഘാൻ താരം ഷെരീഫ് നല്ല ഫോമിലാണ്.കൂടാതെ ഇന്ത്യൻ താരങ്ങളായ എമിൽ ബെന്നി, നവോച്ച സിംഗ്, ദീപക് ദേവരാണി, വിൻസി ബാരെറ്റോ, റൊണാൾഡ്‌ സിംഗ് എന്നിവരും സ്ഥിരതയാർന്ന പ്രകടനമാണ് കാഴ്ചവെച്ചത്. എട്ടു ഗോളുകൾ അടിച്ച ഡെന്നിസും വളരെ നല്ല ഫോമിലാണുള്ളത്.