പത്തനംതിട്ട: കോൺഗ്രസ് വിട്ട് ഒരുപാട് പേർ ബി ജെ പിയിലേക്ക് വരുമെന്ന് അടൂരിലെ എൻ ഡി എ സ്ഥാനാർത്ഥി പന്തളം പ്രതാപൻ. ധാരാളം ആളുകൾ ബി ജെ പിയിലേക്ക് വന്നുകൊണ്ടിരിക്കുകയാണ്. വരുന്നവരുടെ പേരെടുത്ത് പറയുന്നില്ല. പക്ഷേ, വരുംദിവസങ്ങളിൽ അതുണ്ടാകുമെന്നും പന്തളം പ്രതാപൻ പറഞ്ഞു.

ഏറെ വിജയപ്രതീക്ഷയോടെയാണ് അടൂർ മണ്ഡലത്തിൽ മത്സരിക്കുന്നത്. വോട്ടർമാരുടെ പ്രതികരണം കാണുമ്പോൾ ഏറെ വിജയപ്രതീക്ഷയാണുളളത്. മണ്ഡലത്തിലെ കുടിവെളള പ്രശ്‌നവും മാലിന്യപ്രശ്‌നവും പരിഹരിക്കുന്നതിനാണ് മുൻഗണന നൽകുന്നതെന്നും അദ്ദേഹം പറഞ്ഞു.

കോൺഗ്രസ് നേതാവായിരുന്ന പന്തളം പ്രതാപൻ അടുത്തിടെയാണ് കോൺഗ്രസ് വിട്ട് ബി ജെപിയിൽ ചേർന്നത്. ഇതിനുപിന്നാലെയാണ് അടൂരിലെ എൻ ഡി എ സ്ഥാനാർത്ഥിയായി പന്തളം പ്രതാപനെ ബി ജെ പി പ്രഖ്യാപിച്ചത്. മുൻ മന്ത്രിയും കോൺഗ്രസ് നേതാവുമായ പന്തളം സുധാകരന്റെ അനുജനാണ് പന്തളം പ്രതാപൻ. കെ എസ് യുവിലൂടെ രാഷ്ട്രീയത്തിലേക്ക് കടന്ന അദ്ദേഹം യൂത്ത് കോണ്‍ഗ്രസിന്റെ സംസ്ഥാന വൈസ് പ്രസിഡന്റായിരുന്നു.