സിഡ്​നി: ആസ്​ട്രേലിയയിലെ കിഴക്കൻ തീരമായ ന്യൂ സൗത്ത്​ വെയിൽസിൽ കനത്ത മഴയും വെള്ളപ്പൊക്കവും. 50 വർഷത്തിനിടെ ആദ്യമായാണ് ആസ്ട്രേലിയ ഇത്രയും കഠിനമായ വെള്ളപ്പൊക്കക്കെടുതി അനുഭവിക്കുന്നത്. സിഡ്നിയിൽ നിന്ന് ജനങ്ങളെ നേരത്തെ ഒഴിപ്പിച്ചിരുന്നു. വരും ദിവസങ്ങളിലും മഴ കനക്കുമെന്നാണ്​ വിവരം. താഴ്​ന്ന പ്ര​ദേശങ്ങളിലേക്ക്​ വെള്ളം അടിച്ചുകയറുകയാണ്. നിരവധി വീടുകൾ നശിക്കുകയും മരങ്ങൾ കടപുഴകി വീഴുകയും ചെയ്​തു. റോഡ്​ ഗതാഗതം പൂർണമായി തടസപ്പെട്ടു. റോഡുകൾ തകർന്നു. താഴ്​ന്ന പ്രദേശങ്ങളിലെ സ്​കൂളുകൾ അടച്ചിട്ടു.മഴ മൂലം സിഡ്​നിയിലെ കൊവിഡ്​ പ്രതിരോധ പ്രവർത്തനങ്ങൾ തടസപ്പെട്ടു. രാജ്യത്ത് ആദ്യ ഘട്ട വാക്​സിൻ വിതരണം പുരോഗമിക്കുകയാണ്.