മുംബയ്: ഇന്ത്യയുടെ വിദേശ നാണയ കരുതൽ ശേഖരം മാർച്ച് 12ന് സമാപിച്ച വാരത്തിൽ 173.9 കോടി ഡോളർ വർദ്ധിച്ച് 58,203.7 കോടി ഡോളറിലെത്തിയെന്ന് റിസർവ് ബാങ്ക് വ്യക്തമാക്കി. തൊട്ടുമുമ്പത്തെ ആഴ്‌ചയിൽ 425.5 കോടി ഡോളറിന്റെ ഇടിവ് രേഖപ്പെടുത്തിയ ശേഷമാണ് ഈ തിരിച്ചുകയറ്റം. വിദേശ നാണയ ആസ്‌തി 140.9 കോടി ഡോളർ ഉയർന്ന് 54,102.2 കോടി ഡോളറായിട്ടുണ്ട്.

കരുതൽ സ്വർണശേഖരം 33.6 കോടി ഡോളർ ഉയർന്ന് 3,455.1 കോടി ഡോളറിലെത്തി. ഈവർഷം ജനുവരി 29ന് കുറിച്ച 59,018.5 കോടി ഡോളറാണ് വിദേശ നാണയ ശേഖരത്തിന്റെ റെക്കാഡ് ഉയരം. ഡോളറിലാണ് രേഖപ്പെടുത്തുന്നതെങ്കിലും വിദേശ നാണയ ശേഖരത്തിൽ ഡോളറിന് പുറമേ യെൻ, പൗണ്ട്, യൂറോ തുടങ്ങിയവയുമുണ്ട്.