മഞ്ജുവാര്യർ-സണ്ണി വെയ്ൻ ചിത്രമായ ചതുർമുഖം റിലീസിന് ഒരുങ്ങുന്നു. മലയാളത്തിലെ ആദ്യത്തെ ടെക്‌നോഹൊറർ സിനിമായ 'ചതുർമുഖ'ത്തിന്റെ ഫസ്റ്റ് ലുക്ക് മോഷൻ പോസ്റ്റർ സോഷ്യൽ മീഡിയയിൽ വൈറലായിരുന്നു. പോസ്റ്റർ ഇറങ്ങിയതിനു പിന്നാലെ എന്താണ് ടെക്‌നോ ഹൊറർ എന്ന ചർച്ചയും സോഷ്യൽ മീഡിയയിൽ ഉണ്ടായിരുന്നു.
ഫിക്ഷൻ ഹൊററിന്റെ ഒരു ഉപവിഭാഗമാണ് ടെക്‌നോ ഹൊറർ. ഭയത്തിന്റെ മുഖ്യകാരണം ആധുനികശാസ്ത്രവും ടെക്‌നോളജിയും ആയി അവതരിപ്പിക്കപ്പെടുന്ന സിനിമകളാണ് പട്ടികയിൽ വരുന്നത്. പ്രധാനമായും ഹോളിവുഡ്, ജാപ്പനീസ് ഫിലിം മേക്കേർസാണ് ഇത്തരത്തിലുള്ള സിനിമകൾ എടുത്തിട്ടുള്ളത്. പതിവു ഹൊറർ സിനിമകളിലെ പോലെ സാരിയുടുത്ത പ്രേതമോ, പ്രേതബാധയുള്ള വീടോ, മന്ത്രവാദിയുടെ ആവാഹനമോ ഒന്നും ഇല്ലാതെ ഒരുക്കുന്ന ചതുർമുഖം, ഭയപ്പെടുത്തുന്ന സിനിമകൾ ആസ്വദിക്കുന്ന മലയാളി പ്രേക്ഷകർക്ക് ഒരു പുതിയ അനുഭവമായിരിക്കും.
മഞ്ജുവിന്റെ തേജസ്വിനി, സണ്ണിയുടെ ആന്റണി, അലൻസിയറുടെ ക്ലെമെന്റ് എന്നീ കഥാപാത്രങ്ങളിലൂടെയാണ് സിനിമ സഞ്ചരിക്കുന്നത്. കോളേജ് മേറ്റ്‌സായ തേജസ്വിനിയും ആന്റണിയും ഇപ്പോൾ തിരുവനന്തപുരത്ത് ഒരു സിസിടിവി സെക്യൂരിറ്റി സൊല്യൂഷൻസിന്റെ ബിസിനസ്സ് നടത്തുകയാണ്. ഇവരുടെ ജീവിതത്തിലേക്ക് റിട്ട. അഗ്രികൾച്ചറൽ കോളേജ് അദ്ധ്യാപകനായ ക്ലെമെന്റ് കടന്ന് വരാനുണ്ടാകുന്ന ഒരു അസാധാരണസാഹചര്യവും അതിന്റെ തുടർച്ചയായ് ഉണ്ടാവുന്ന സംഭവങ്ങളുമാണ് സിനിമയിൽ പ്രതിപാദിക്കുന്നത്.
ഈ മൂന്നു മുഖങ്ങൾ കൂടാതെ സിനിമയുടെ പേരു സൂചിപ്പിക്കുന്നതു പോലെ നാലാമതൊരു മുഖം കൂടി സിനിമയിലുണ്ട്. അതൊരു രൂപമാകാം വസ്തുവാകാം വ്യക്തിയാവാം. പേരിലെ നിഗൂഢത സിനിമയിലെ പ്രേതത്തിന്റെ കാര്യത്തിലും ഉണ്ട്. ചതുർമുഖത്തിലെ 'വില്ലൻ' അഥവാ 'പ്രേതം' ആരാണെന്ന കാര്യവും ഇതു വരെ വെളിവാക്കപ്പെട്ടിട്ടില്ല. നിരഞ്ജന അനൂപ്, ശ്യാമപ്രസാദ്, ശ്രീകാന്ത് മുരളി, റോണി ഡേവിഡ്, നവാസ് വള്ളിക്കുന്ന്, ഷാജു ശ്രീധർ, കലാഭവൻ പ്രജോദ് തുടങ്ങി വലിയൊരു താരാനിരയുള്ള ചിത്രത്തിൽ അതാരുമാകാം. സിനിമ ഇറങ്ങുന്ന വരെ എല്ലാമൊരു സസ്‌പെൻസ് ആയി ഇരിക്കട്ടെ എന്നാണ് അണിയറക്കാർ പറയുന്നത്.
അഞ്ചര കോടി മുതൽമുടക്കിൽ വിഷ്വൽഗ്രാഫിക്‌സിനും സൗണ്ട് ഡിസൈനിംഗിനും പ്രാധാന്യം നൽകി കൊണ്ട് നിർമ്മിച്ചിരിക്കുന്ന സിനിമയുടെ പ്രധാന ഹൈലൈറ്റ് തന്നെ ഇത് വരെ കാണാത്ത മഞ്ജു വാര്യരുടെ ആക്ഷൻ സീക്വൻസുകളാണ്.
നവാഗതരായ രഞ്ജീത്ത് കമല ശങ്കർ, സലിൽ വി എന്നിവർ ചേർന്നാണ് സംവിധാനം ചെയ്തിരിക്കുന്നത്. ജിസ്സ് ടോംസ് മൂവീസ്സിന്റെ ബാനറിൽ മഞ്ജുവാര്യർ പ്രൊഡക്ഷൻസുമൊത്ത് ചേർന്ന് ജിസ്സ് ടോംസും ജസ്റ്റിൻ തോമസ്സും ചേർന്നാണ് ചിത്രം നിർമ്മിച്ചിരിക്കുന്നത്. പുണ്യാളൻ അഗർബത്തീസ്, സു...സു...സുധി വൽമീകം എന്നീ ചിത്രങ്ങളുടെ സഹരചയിതാക്കളായ അഭയകുമാർ കെ, അനിൽ കുര്യൻ എന്നിവർ എഴുതിയ ഈ ചിത്രത്തിലെ ഛായാഗ്രഹണം നിർവ്വഹിച്ചിരിക്കുന്നത് അഭിനന്ദൻ രാമാനുജമാണ്.