യംങ്കൂൺ: അച്ഛാ... എനിയ്ക്ക് സഹിക്കാൻ കഴിയുന്നില്ല. നല്ല വേദനയുണ്ട്. വെടിയേറ്റ് പിതാവിന്റെ മടിയിലേക്ക് വീണ മ്യാൻമറിലെ ആ ഏഴ് വയസുകാരി മരണത്തിന് ഏതാനും നിമിഷങ്ങൾക്ക് മുൻപ് പറഞ്ഞ വാക്കുകളാണിത്. ഖിൻ മ്യോ ചിത്​ എന്ന ആ കുരുന്നിനെ ആശുപത്രിയിലെത്തിച്ചെങ്കിലും അവളുടെ പിഞ്ചുശരീരത്തിന് അത്രയും വേദന താങ്ങാനുള്ള കരുത്തുണ്ടായിരുന്നില്ല. അകാലത്തിൽ ജീവൻ പൊലിഞ്ഞ ചിത് മ്യാൻമറിലെ ജനാധിപത്യ പ്രക്ഷോഭത്തിന്റെ അടയാളമായി മാറിയിരിക്കുകയാണ്.

 തോക്കിൻമുനയിൽ കുരുന്ന് ജീവൻ

ചൊവ്വാഴ്ച വൈകിട്ടാണ്​ ​സൈന്യം ആയുധങ്ങളുണ്ടോയെന്ന്​ പരിശോധിക്കാനും പ്രക്ഷോഭകരെ അറസ്റ്റ്​ ചെയ്യാനും മാൻഡലായിയിൽ എത്തിയത്.അവർ വന്നപാടെ വീടിന്റെ വാതിൽ ചവിട്ടിത്തുറന്നു. കതകുതുറന്നശേഷം അകത്ത്​ ആരെങ്കിലുമുണ്ടോ എന്ന്​ പിതാവിനോടവർ ചോദിച്ചു. 'ഇല്ല' എന്ന്​ അദ്ദേഹം മറുപടി പറഞ്ഞതോടെ ​നുണ പറയുകയാണെന്ന്​ പറഞ്ഞ്​ അവർ അകത്തു കയറി പരിശോധന തുടങ്ങി. ഇതിനിടയിലാണ്​ പേടിച്ചരണ്ട അനുജത്തി ​ പിതാവിന്റെ മടിയിലിരിക്കാനായി അദ്ദേഹത്തിനടുത്തേക്ക്​ ഓടിയത്​. ഉടൻ അവർ അവൾക്കുനേരെ നിർദാക്ഷിണ്യം വെടിവയ്ക്കുകയായിരുന്നു - ചിതിന്റെ മൂത്ത സഹോദരി സുമയ്യ കണ്ണീരോടെ പറഞ്ഞു.

ചിതിന്റെ 19 കാരൻ സഹോദരനെയും പൊലീസ്​ മർദ്ദിക്കുകയും അറസ്റ്റ്​ ചെയ്യുകയും ചെയ്​തിട്ടുണ്ട്​. ചിതിന്റെ മരണത്തോട്​ സൈന്യം ഇതുവരെ പ്രതികരിച്ചിട്ടില്ല.

എന്റെ പൊന്നുമോൾക്ക്​ വേദന സഹിക്കാനാവുന്നുണ്ടായിരുന്നില്ല. ഞങ്ങളവളെ ഒരു കാറിൽ ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.'

ചിതിന്റെ പിതാവ് ഉമോംഗ്​ കോ ഹാഷിൻ ബായ്

 കൊല്ലപ്പെട്ടത് 20 ലധികം കുഞ്ഞുങ്ങൾ

മ്യാന്മറിൽ പട്ടാളം ഭരണം പിടിച്ചെടുത്തശേഷം നടക്കുന്ന അതിക്രമങ്ങളിൽ 20ലധികം കുഞ്ഞുങ്ങൾ കൊല്ലപ്പെട്ടതായി 'സേവ്​ ദ ചിൽഡ്രൻ' ഗ്രൂപ്പ്​ വെളിപ്പെടുത്തി. പ്രക്ഷോഭകർക്കുനേരെ അതിക്രൂരമായ നടപടികളാണ്​ പട്ടാളം സ്വീകരിക്കുന്നത്​. സൈന്യം കൊന്നവരിൽ ഏറ്റവും ഇളയവളാണ്​ ഖിൻ മ്യോ ചിത്​. കഴിഞ്ഞ ദിവസം മൻഡലായിയിൽതന്നെ ഒരു 14 കാരൻ കൊല്ലപ്പെട്ടിരുന്നു.