ബിലാസ്പൂർ : അദ്ധ്യാപിക ശാരീരികമായും മാനസികമായും പീഡിപ്പിച്ചതിനെ തുടർന്ന് 16കാരൻ ആത്മഹത്യ ചെയ്തു. ചത്തീസ്‌ഗഢിലെ ബിലാസ്‌പൂരിലാണ് സംഭവം. സംഭവത്തിൽ 30കാരിയായ അദ്ധ്യാപിക ഏകയെ പൊലീസ് അറസ്റ്റ് ചെയ്തു. ആത്മഹത്യയ്ക്ക് മുൻപ് 16കാരൻ സോഷ്യൽ മീഡിയയിൽ പങ്കിട്ട കുറിപ്പിന്റെ അടിസ്ഥാനത്തിലാണ് പ്രതിയെ അറസ്റ്റുചെയ്തത്.

പ്ലസ് വൺ വിദ്യാർത്ഥിയായ 16കാരനെ മുറിയക്കകത്ത് സീലിംഗ് ഫാനിലാണ് തൂങ്ങിമരിച്ച നിലയിൽ കണ്ടെത്തിയത്.. അമ്മയ്‌ക്കൊപ്പം താമസിച്ചിരുന്ന വിദ്യാർത്ഥി വീട്ടിൽ ആരുമില്ലാത്ത സമയത്തായിരുന്നു ജീവനൊടുക്കിയത്. അമ്മ തിരിച്ചെത്തിയപ്പോൾ മകനെ തൂങ്ങിമരിച്ച നിലയിൽ കണ്ടെത്തുകയായിരുന്നെന്നും പൊലീസ് പറഞ്ഞു.

സുഹൃത്തുക്കളെ ടാഗ് ചെയ്തുകൊണ്ടാണ് ആത്മഹത്യയ്ക്ക് മുൻപായി വിദ്യാർത്ഥി ഫേസ്ബുക്കിൽ കുറിപ്പിട്ടത്.. ഇംഗ്ലീഷ് ഭാഷയിൽ പ്രത്യേക കോഡ് ഉപയോഗിച്ചുകൊണ്ടായിരുന്നു കുറിപ്പ്. ഈ സന്ദേശത്തിലൂടെയാണ് പൊലീസ് പ്രതിയെ കണ്ടെത്തിയത്.

ടീച്ചർ അടുത്തിടെ സർക്കാർ സ്‌കൂളിലേക്ക് മാറിയിരുന്നു. ആൺകുട്ടിയുമായി അദ്ധ്യാപിക അടുപ്പം പുലർത്തിയിരുന്നതായും ആത്മഹത്യ ചെയത ദിവസവും ഇവർ തമ്മിൽ കണ്ടിരുന്നതായും പൊലീസ് പറയുന്നു. പ്രതിയ്‌ക്കെതിരെ ആത്മഹത്യാപ്രേരണ, പോക്‌സോ വകുപ്പുകൾ ചുമത്തിയാണ് കേസ് എടുത്തത്‌