ഓക്‌ലൻഡ്: വെള്ളത്താൽ ചുറ്റപ്പെട്ട ശാന്തസുന്ദരമായ രാജ്യമാണ് ന്യൂസിലൻഡ്. ചരിത്രാതീത കാലത്ത് കടലിൽ മറഞ്ഞ സീലാൻഡിയ എന്ന ഭൂഖണ്ഡത്തിന്റെ അവശേഷിപ്പാണ് ന്യൂസിലൻഡെന്ന പ്രകൃതിമമോഹര രാജ്യമെന്നത് എത്ര പേർക്കറിയാം?. ന്യൂ കാലിഡോണിയ എന്ന ദ്വീപും ഈ ഭൂഖണ്ഡത്തിന്റെ ഭാഗമായിരുന്നു. സീലാൻഡിയയുടെ ബാക്കിയുള്ള 94 ശതമാനം പ്രദേശവും സമുദ്രത്തിനടിയിലാണ്. ഇപ്പോൾ ഈ ഭൂഖണ്ഡത്തിന്റെ കൃത്യമായ അതിർത്തികൾ കണ്ടെത്താനും സവിശേഷതകൾ നിർണയിക്കാനുമുള്ള ശ്രമത്തിലാണ് ആസ്‌ട്രേലിയയിലെ ക്വീൻസ്‌ലൻഡ് സർവകലാശാലയിലെ ഗവേഷകർ. 28 ദിവസം പിന്നിട്ട വമ്പൻ സമുദ്രപര്യവേക്ഷണം ഇതിനായി നടത്തിക്കഴിഞ്ഞു. 37000 ചതുരശ്ര കിലോമീറ്ററോളം ഇവർ ഈ വിധം മാപ്പു ചെയ്തു കഴിഞ്ഞു. ആസ്‌ട്രേലിയയിലെ പ്രശസ്തയായ ഭൗമശാസ്ത്രജ്ഞ ഡെര്യ ഗുരറിന്റെ നേതൃത്വത്തിലാണ് ഗവേഷണം നടക്കുന്നത്.
സീലാൻഡിയയെക്കുറിച്ചറിയാം
ഏകദേശം 50 ലക്ഷം ചതുരശ്ര കിലോമീറ്റർ വിസ്തീർണമുള്ള ഭൂഖണ്ഡമായിരുന്നു സീലാൻഡിയ.യൂറോപ്പിന്റെ പകുതിയോളം വരുമിത്. 2017ലാണ് സീലാൻഡിയയ്ക്ക് ഭൂഖണ്ഡപദവി ലഭിക്കുന്നത്. തെക്കൻ ശാന്തസമുദ്രത്തിന് 3500 അടിയോളം ആഴത്തിൽ സ്ഥിതി ചെയ്യുന്നതിനാൽ സീലാൻഡിയയുടെ അതിർത്തി കൃത്യമായി കണ്ടെത്തുന്നത് വെല്ലുവിളിയാണ്. 17ാം നൂറ്റാണ്ടിൽ യൂറോപ്യൻമാർ ഇങ്ങനെയൊരു ഭൂഖണ്ഡം ഭൂമിയുടെ തെക്കേയറ്റത്തുണ്ടാകുമെന്ന് കണക്കുകൂട്ടിയിരുന്നു. ടെറാ ആസ്‌ട്രേലിസ് എന്നായിരുന്നു അവർ ഈ സാങ്കൽപിക ഭൂഖണ്ഡത്തിനു നൽകിയ പേര്.
ടാസ്മാന്റെ യാത്ര
1642ൽ ആബെൽ ടാസ്മാൻ എന്ന ഡച്ച് പര്യവേക്ഷകൻ ഈ ഭൂഖണ്ഡം തേടി ഇന്തൊനേഷ്യയിലെ ജക്കാർത്തയിൽ നിന്ന് യാത്ര തുടങ്ങി. അവസാനം അദ്ദേഹം ന്യൂസിലൻഡിന്റെ സൗത്ത് ഐലൻഡിൽ എത്തിച്ചേർന്നു. അവിടുത്തെ തദ്ദേശീയ ജനതയായ മവോരി ഗോത്രവർഗ്ഗക്കാർ ടാസ്മാനേയും സംഘത്തേയും ആക്രമിച്ചു. താൻ കപ്പൽ ഇറങ്ങിയ സ്ഥലത്തിനു കൊലപാതകികളുടെ ഉൾക്കടൽ (മർഡറേഴ്‌സ് ബേ) എന്നു പേരിട്ട ശേഷം ന്യൂസിലൻഡിൽ ഇറങ്ങാതെ ടാസ്മാൻ മടങ്ങി,
ഹെക്ടറിന്റെ പഠനവും ബ്രൂസിന്റെ കണ്ടെത്തലും
1895ൽ സ്‌കോട്ടിഷ് ശാസ്ത്രജ്ഞനായ ജയിംസ് ഹെക്ടർ ന്യൂസിലൻഡിനെ കുറിച്ച് നിരവധി പഠനങ്ങൾ നടത്തിയ ശേഷം ദ്വീപ് പഴയകാലത്ത് ഒരു വലിയ കരയുടെ ഭാഗമായിരുന്നെന്ന് തന്റെ ഡയറിയിൽ കുറിച്ചു. 1995ൽ ഭൗമശാസ്ത്രജ്ഞനായ ബ്രൂസ് ല്യൂയെൻഡിക്കാണ് എട്ടാം ഭൂഖണ്ഡ‌മെന്ന് കരുതപ്പെടുന്ന സീലാൻഡിയയെക്കുറിച്ചുള്ള ആശയം ആദ്യം പുറത്തിറക്കിയത്. ന്യൂസലൻഡിനും ആസ്‌ട്രേലിയയ്ക്കും സമീപം നടത്തിയ ഗവേഷണങ്ങളുടെ പശ്ചാത്തലത്തിലായിരുന്നു ഇത്.
ലോറേഷ്യയും ഗോണ്ട്‌വാനയും
ആദിമകാലത്ത് ഭൂമിയിൽ പാൻജിയ എന്ന ഒറ്റ വൻകരയാണുണ്ടായിരുന്നത്. ഇതു പിന്നീട് ലോറേഷ്യ എന്നും ഗോണ്ട്‌വാന എന്നും രണ്ട് ഭൂഖണ്ഡങ്ങളായി മാറി. ഇന്നത്തെ ആഫ്രിക്ക, അന്റാർട്ടിക്ക, തെക്കൻ അമേരിക്ക, ആസ്‌ട്രേലിയ എന്നിവയും ഇന്ത്യൻ, അറേബ്യൻ ഉപഭൂഖണ്ഡങ്ങളും ഉൾപ്പെട്ടതായിരുന്നു ഗോണ്ട്‌വാന. എന്നാൽ എട്ടരക്കോടി വർഷം മുൻപ് ഗോണ്ട്‌വാനയിൽ നിന്ന് ആസ്‌ട്രേലിയയും സീലാൻഡിയയും ഉൾപ്പെട്ട കരഭാഗം വേർപെട്ട് തെക്കോട്ടു നീങ്ങി. ഇതിന്റെ തുടർച്ചയായി 5 കോടി വർഷം മുൻപ് സീലാൻഡിയ സമുദ്രത്തിനടിയിലായി എന്നാണ് ശാസ്ത്രജ്ഞർ പറയുന്നത്.