കുമരകം : താറാവിനെ കാണാൻ പാടശേഖരത്തിന് സമീപമെത്തിയ രണ്ടര വയസുകാരൻ മുങ്ങിമരിച്ചു. ചെങ്ങളം വായനശാലയ്ക്ക് സമീപം നാൽപ്പറയിൽ പ്രശാന്തന്റെയും കാർത്തികയുടെയും മകൻ ആയുഷിനാണ് ദാരുണാന്ത്യം. ഇന്നലെ രാവിലെ 11.30 ഓടെയായിരുന്നു സംഭവം. ചെങ്ങളം മണലേൽ അഭിലാഷിന്റെ വീട്ടിൽ വാടകയ്ക്ക് താമസിക്കുകയായിരുന്നു കുടുംബം.

രാവിലെ വീടിന് സമീപത്ത് കളിക്കുകയായിരുന്ന ആയുഷിനെ കാണാതാകുകയായിരുന്നു തിരക്കി വീട്ടിൽ നിന്ന് പുറത്തിറങ്ങിയ നാലു വയസുകാരി സഹോദരി അനാമികയാണ് കുട്ടി വെള്ളത്തിൽ വീണ് കിടക്കുന്നത് കണ്ടത്. നാട്ടുകാർ ചേർന്ന് കുട്ടിയെ പുറത്തെടുത്തെങ്കിലും മരണം സംഭവിച്ചിരുന്നു. കൊയ്ത്ത് കഴിഞ്ഞ മാടപ്പള്ളിക്കാട് പാടശേഖരത്ത് മൂന്ന് ദിവസം മുൻപാണ് വെള്ളം കയറ്റി തുടങ്ങിയത്. മൃതദേഹം മെഡിക്കൽ കോളേജ് ആശുപത്രി മോർച്ചറിയിലേക്കു മാറ്റി. സംസ്‌കാരം ഇന്ന് ഉച്ചയ്ക്ക് 1 ന് വീട്ടുവളപ്പിൽ.