കണ്ണൂർ: ഇനി ഒരു തിരഞ്ഞെടുപ്പിലും മത്സരിക്കാനില്ലെന്ന് വ്യക്തമാക്കി വ്യവസായ മന്ത്രി ഇ പി ജയരാജൻ. നിലപാട് പാർട്ടി അംഗീകരിക്കുമെന്നാണ് കരുതുന്നത്. ഇനി പാർട്ടി പറഞ്ഞാലും മത്സരിക്കില്ലെന്നും ജയരാജൻ വ്യക്തമാക്കി.

ബുദ്ധിമുട്ട് പാർട്ടിയെ ബോദ്ധ്യപ്പെടുത്തും. ഇത്തവണ മത്സരിക്കാൻ പറ്റാത്ത നിരാശയിലാണ് ഈ പറയുന്നതെന്ന് മാദ്ധ്യമങ്ങൾ വ്യാഖ്യാനിച്ചാൽ അതിൽ പരാതിയില്ല. താൻ ആരെയും ഭയപ്പെടാതെ തന്റെ കാര്യം പറയുകയാണ്. മട്ടന്നൂരും കല്യാശേരിയിലും മത്സരിക്കണമെന്ന് ആളുകൾ ആഗ്രഹം പ്രകടിപ്പിച്ചിരുന്നു. മൂന്ന് ടേം എം എൽ എ ആയി, ഒരിക്കൽ മന്ത്രി ആയി. ഇനി ഈ രംഗത്തേക്കില്ലെന്നും ജയരാജൻ പറഞ്ഞു.

മുഖ്യമന്ത്രി പിണറായിയുടെ അടുത്തെത്താനൊന്നും ഞങ്ങൾക്ക് കഴിയില്ല. അദ്ദേഹം പ്രത്യേക കഴിവും ഊർജവുമുളള ഒരു മഹാ മനുഷ്യനാണ്. അദ്ദേഹത്തിന് അടുത്തെത്താൻ സാധിച്ചാൽ ഞാൻ പുണ്യവാനായി തീരുമെന്നും അതിന് കഴിയുന്നില്ലല്ലോ എന്നതാണ് ദു:ഖമെന്നും ജയരാജൻ പറഞ്ഞു.