ഭുവനേശ്വർ: ആശുപത്രിയിലേയ്ക്ക് ബൈക്കിൽ പോയ ഗർഭിണിയെ ഹെൽമറ്റ് ധരിക്കാത്തതിന് തടഞ്ഞുവച്ച് പിഴചുമത്തി, അത് അടയ്ക്കാനായി പൊരിവെയിലിൽ മൂന്ന് കിലോമീറ്റർ നടത്തിച്ച പൊലീസ് ഉദ്യോഗസ്ഥയെ സസ്‌പെൻഡ് ചെയ്തു. ഒഡിഷയിലെ മയൂർബഞ്ജിലാണ് സംഭവം.
ഭർത്താവിനൊപ്പം ബൈക്കിന്റെ പിൻസീറ്റിലിരുന്ന് ആശുപത്രിയിൽ പരിശോധനയ്ക്ക് പോവുകയായിരുന്ന ഗുരുബാരി എന്ന യുവതിയെ ഹെൽമറ്റ് ധരിച്ചില്ലെന്ന പേരിലാണ് പൊലീസ് തടഞ്ഞത്.
ആരോഗ്യപ്രശ്നങ്ങൾ കാരണമാണ് ഗുരുബാരി ഹെൽമറ്റ് ധരിക്കാതിരുന്നതെന്ന് ഭർത്താവ് ബിക്രം ബിരുലി പറഞ്ഞുനോക്കിയെങ്കിലും സാരത്ത് പൊലീസ് സ്‌റ്റേഷനിലെ ഓഫീസർ ഇൻ ചാർജ്ജായ റീന ബക്സൽ അത് ചെവിക്കൊണ്ടില്ല. പിഴയായി അഞ്ഞൂറ് രൂപ അടയ്ക്കണമെന്ന് ശഠിച്ച റീന ബക്സൽ പിഴ മൂന്ന് കിലോമീറ്റർ അകലെയുള്ള പൊലീസ് സ്റ്റേഷനിൽ നേരിട്ട് പോയി അടയ്ക്കണമെന്നും ആവശ്യപ്പെട്ടു.
ഇതിനെ തുടർന്ന് പൊരിവെയിലിൽ ഭാര്യയെയും കൂട്ടി നടന്നുപോയി പിഴ അടച്ചശേഷം ബിക്രം ഉന്നത പൊലീസ് ഉദ്യോഗസ്ഥർക്ക് ഇതു സംബന്ധിച്ച് പരാതി നൽകി. ഇതിനെ തുടർന്നാണ് റീന ബക്സലിനെ മയൂർബഞ്ജ് എസ്.പി അന്വേഷണവിധേയമായി സസ്‌പെൻഡ് ചെയ്തത്.